Hoy buang!

Kini ang giingon sa Dios ngadto sa usa ka tawo nga nagtuo nga anaa na kaniya ang tanang seguridad sa dihang nahipos niya ang tanang mga bahandi nga sa iyang panlantaw maoy magdala kaniya sa kaluwasan gikan sa bisan unsang kamatayon.

Apan sayop siya kay nianang maong gabii siya mismo ang nabawian sa iyang gininhawa. Namatay siya ug nahabilin ra gyud ang tanan niyang napondar. Kining maong kamatuoran maoy nipahigmata kanatong tanan sa buhing kamatuoran sa kamatayon.

Dili pa lang dugay gimando sa IATF nga sirad-an ang tanang mga sam-ang sugod karong Oktubre 29 hangtod Nobiyembre 4.

Kini aron pagpugong sa posibilidad sa pagkuyanap sa COVID. Sayud man kitang tanan nga ang COVID-19 daghan namang kinabuhi ang nakalas. Tungod niini kinahanglang magmaigmaton gyud ang tanan.

Daghang mga higayon nga kita nagtuo nga mamahimong okay lamang ang tanan kun maningkamot ug magpondo.

Apan ang pagkumpiyansa nga kita anaa dili man sukaranan nga mamahimong han-ay ang tanan. Apan ang kamatayon maoy sukaranan nga kinahanglang mobuhat kita og maayo ug makahuloganon samtang makahimo pa kita kay ang ugma wala namay kasegurohan.

Sa atong pagduaw sa mga sam-ang atong nakita dinhi ang atong kaugmaon. Lawas nato madugta ug mobalik sa abo diin kini gikan.

Ang atong mga natigom mahimong angkonon sa uban. Ang ubang mga tawo mahimong mahikalimot sa atong mga maayong buhat.

Ang mga tawo mamahimong moyamiid kanato sanglit wala man nila madawat ang atong pagka kita. Apan ang sukaranan sa tanan mao nga kitang tanan mobalik ra gyud sa yuta nga atong gigikanan. Mao nga walay hinungdan nga kita mamahimong magmapahitas-on.

Hinangat naman tuod ang kalagkalag ning bag-ong normal nga giisip nato. Bag-ong normal nga maghatag kanato og kauhaw sa pisikal nga presensiya. Apan ang pandemiya mao man ang nipugong kanato sa paghimo sa ingon.

Ang pandemiya nga maoy nibuot sa atong linihokan. Ang pandemiya nga maoy nagdala og dimalas sa atong kinabuhi sa kalambigitan. Ug gani gihimo kini sa ubang anaa sa posisyon ingon nga kahimanan sa pagpaburot sa ilang kaugalingong mga bulsa.

Dunay mga panghitabo aron dunay matukod nga patigayon at the expense sa kinabag-an labina gyud sa mga kabus ug timawa ning atong katilingban.

Ang mga yamokmok padayong gigukod sa mga dagko ug gamhanan. Subo palandungon nga ang kinabag-an maglisud diha sa pakigharong.

Hoy buang! Kini ang atong masulti dili lang nila nga giisip natong makadaut kanato kondili usab kanatong mga hingtungdan nga nagtuo nga kita mismo seguro sa atong seguridad.