Kinsa'y mabulahan sa budget?

Human sa panagbangi sa liderato sa Kamara nga nakapalangan sa pagpasar sa 2021 budget, naaprobahan na gayod kini sa mga Kongresista sa kantidad nga P4.506 Trillion.  Iduso pa ang bersyon sa Kamara ngadto sa Senado alang sa ilang pag-iskutinyo.  Kon itandi sa paghimo’g pizza pie, maingon ta nga ang Kongreso mao ang tig-pigura ug ang Senado mao ang hurnero.  Kon “maluto” na ang pizza pie nga mao ang 2021 budget, hinaut nga ang dakong hiwa niini idalit ngadto sa katawhan ug dili kay ang magbabalaod ra ang magpahimulos.  Kalooy pud ni Juan de la Cruz.

Naay tulay, way sapâ

Matud pa ni Prof. Salvador Singson-de Guzman, pangulo sa pundok batok kurapsyon, ang mga Kongresista ug ubang politiko maoy nagpaluyo sa kurapsyon diha sa DPWH. Dugang ni de Guzman nga ang pundo sa mga proyekto maoy tinubdan sa kickback gikan sa ilang pinili nga kontraktor.  Karaan na kini nga kansyon. Sama ka karaan sa sugilanon sa politiko nga misaad nga pabuhatan niya og tulay ang barangay.  Sa dihang gitubag siya sa botante nga “Nyor, wa may sapa dinhi sa amo”, mipasalig gilayon ang politiko sa pag-ingon, “Atong buhatan og sapa”. Madahaaan!

Pakyas nga saad?

Padayon pa’ng nagpaabot ang mga nurse nga nagtrabaho sa mga pribadong hospital sa cash incentive nga gisaad nga ihatag kanila sa kagamhanan sa Dakbayan sa Sugbo.  Kini ang gipahinumdum sa PNA, pinaagi sa ilang Presidente nga si Joseph Stephen Descallar, ngadto sa mga opisyales sa dakbayan.  Ang pagsaad politikanhon, ang pagtuman balaanon. Kon maprenda pa lang ang saad, daghan na ang wa makukat kay na-remate na. Saoonz!

Di lang mamugos

Ubos sa Resolution No. 79 sa IATF, mahimo na’ng makagawas sa panimalay ang mga nagpanuigon og 15 anyos pataas ingon man ang mga 65 anyos nga senior citizens.  Gitugotan na usab ang pagpahigayon og sabong o tigbakay.  Apan samtang uyon si Mayor Ed Labella nga pagawson nga ang mga minors ug senior citizens, dili lang una niya tugtan ang sabong.  

Bisan butangan pa og daghang tarpaulin palibot sa buwangan nga adunay sibya nga, “This cockfight is brought to you by IATF”, dakpon gihapon ang magsabong. Dili lang ‘ta mamugos!

Tiktok makapabulay-og

Gidili na karon sa mga kapolisan nga nadestino sa Central Visayas ang pag-Tiktok samtang sila naka-uniporme ug on duty kay giingon nga maka-apektar kini sa ilang “efficiency” kon katakus isip mga police officers. 

Mahimong masilotan ang polis nga dili motamod sa maong direktiba.   Wala pa ang Tiktok, gisaway na daan ang kabulay-og sa kapolisan.  Leadership by example ug no-nonsense discipline tingale ang gikinahanglan.  Unsaon pagkab-ot sa “efficiency” nga wala gani tingale kahibalo ang ubang polis sa definition niini? Pagkatoytoy!