Kaangayan

Oktubre 18, 2020: Ikakawhaag-siyam nga Domingo sulod sa tuig

Mga Pagbasa: Is. 45;1,4-6/Sal. 96/2 Tes. 1;1-5b/Mt. 22;15-21

Kun maghisgot kita og kaangayan nagpasabot kini og paghatag kun unsay giisip natong angayan ngadto sa mga tawo nga hingtungdan.

Giving what is due matud pang Santo Tomas de Aquino. Gani dugang pa niini dunay panultihon nga nagkanayon: Justice without mercy is tyranny and mercy without justice is folly.

Sa atong ebanghelyo karon gipahimug-atan ni Jesus ang paghatag kun unsay alang sa Dios iya gyud sa Dios ug unsay alang sa emperador iya sa emperador. Wala kini magpasabot nga managsumpaki ang duroha ka mga institusyon.

Hinunoa, mahinungdanon kaayo ang paghatag og kahigayonan sa matag usa sa paghimo sa katungdanan nga nahaom sa iyang kahimtang.

Sa laing bahin, alang sa mga individual nga hingtungdan ning tungora nagtumbok kini kanatong mga lungsoranon sa pagtuman sa atong katungdanan ngadto sa atong nasud. Ang pagsunod sa mga batakang balaod, ang pagbayad sa buhisan, ang pag-alagad alang sa kaayohan sa kinabag-an maayo naman nga sinugdanan sa pagkab-ot sa tinud-anay nga kalamboan. Sa laing bahin, ang pagsimba matag adlaw nga Dominggo ug piyestang iglilihi sukaranan man sa pagpadayag sa atong dakong tinguha sa pagtuman sa katungdanan isip mga lungsoranon sa langitnong katilingban.

Kining atong mga gipanghisgotan mao man gyud unta ang giisip natong ideyal diha sa atong panghunahuna ug kun unsay gilatid sa balaod sa kinaiyahan.

Apan ang pait kay kutob lang sila sa hunahuna ug halayo ra gyud sa buhat. Ang hustisya dili lang mahitungod sa buhisan kondili ang paghatag og kun unsay angayan sibo sa kalooy ug tawhanong pagpakabana.

Dili pa lang dugay subo palandungon nga dinhi sa Pilipinas mismo ang nangangkong duyan sa Kristiyanismo dinhi sa Asya ang naglisud usab sa pagpatuman niini.

Nahimong pilian kaayo ang kaangayan. Ang mga dagkong tawo nga grabe kaayo og binuhatan diha sa ilang pagpangawkaw sa kaban sa nasud ang nahimong gawasnon ug nahimong hahayay sa dagan sa panahon. Samtang ang mga yamokmok nga igo lang nipadayag sa ilang tingog ang gihikawan man sa kahigayonan. Ingon ini gyud ang atong katilingban.

Bisan gani sa katapusang pagyuko sa mga minatay ang wala man gyud tugoti kay lagi sila rebelde.

Hangtod kanus-a man kaha kining maong pagpanglutos sa mga dinaogdaog ug hangtud asa man kutob ang tawhanong kahakog? Bugtong ang Dios ray nasayud.

Tinuod dili tanan ang nisubay sa dalan nga tul-id. Bisan gani ang anaa sa dalan sa katarong ang usahay mahitumpawak man sa dangog nga kalibutan.

Lisud gyud tuod ang tanan apan kun isilsil lang gyud sa atong alimpatakan ang mga hunahuna nga maayo ug makatarunganon, nan, ang atong binuhatan mohimo gyud niini….