Nagkagamay positive cases, apan …

At least makaginhawa na ta’g luag niining padayon nga pagkunhod sa gidaghanon sa mga natakdan sa virus. Matud ni Konsehal Joel Garganera, deputy chief implementor sa Emergency Operations Center ning dakbayan, “It’s a record for Cebu City with only two positive and around 411 tested and a positivity rate of 0.48 percent.” Nindot, apan, dili maayong mokumpiyansa tungod kay si coronavirus ania pa man uban kanato.

Hinumduman nga sa niaging duha ka bulan, nahimo kitang epicenter sa pagkuyanap sa kagaw nga gikan sa China.

Si Mayor Ed Labella, niining panahona, napuno sa mga pagsaway, apan, karon, samtang kadtong mga nanaway kaniya, wala man modayeg sa mayor, but at least mihunong na sila sa ilang mga pagsaway. Pahuway kadiyot gikan sa politika.

Apan karon, nahimo na usab kitang sentro sa malampuson natong pagpakigbatok sa coronavirus.

Dugang ni Garganera: “Cebu City also had the most number of recoveries in a day in the last 39 days with 120, but everything is erratic so let us continue to be vigilant.”

Dinhi atong makita nga after all, dili diay gahi’g ulo ang mga Sugbuanon. Nagpabadlong lang gyud, like naughty children, ug ato lang gi-take-for-granted ang hulga sa coronavirus.

Apan, gikinahanglan gihapon ang pag-amping ug pagpabinantayon, kay lagi wala pa molayas ang virus. Gani, kon buot hunahunaon, tungod kay ubay-ubay nang mga tawo ang manggawas gikan sa panimalay, kuyaw nga modaku ang kahigayunan  sa pagtinakdanay.

Mao nga kinahanglan gihapon ang higpit ug mas estrikto nga pag-observe sa mga health protocols. Ang uban ra ba nato, dili na magsul-ob og facemask ug face shield, kon magsulb-ob man, ang facemask anha na sa suwang ibutang, ug ang face shield himuon nga headband.  Pastilan pagkakulokoy baya gyud natong mga Pinoy.

Tugon ni Garganera:  “You protect yourself because by protecting yourself, you are also protecting your loved ones and the community. “ Sakto. Ang atong pag-amping ug pagpanalipod sa atong kaugaiingon, ato usab nga gi-proteksiyonan ang atong mga minahal sa kinabuhi ug ang katilingban mismo.

Ang pagkunhod sa gidaghanon sa mga na-positibo sa atong dakbayan, mao usab kini ang nasinati  sa kasilinganan natong dakbayan sa Mandaue,Lapi-Lapu, ug Talisay. Ingonman sa lalawigan sa Sugbo, Bohol, Negros Oriental, ug Siquijor.

* * *

Nindot ning Localization Assignment Program sa Philippine National Police (PNP), diin ang kapolisan adto na i-asssign sa ilang mga dapit-natawhan, sa ilang mga hometowns. Kay gawas nga mahiuban na sila sa ilang mga pamilya, mawagtang o kaminosan na ang kahigayunan o tentasayon nga makig-uban sila’g laing pamilya sa ilang present assignments.

Karon, ubay-ubay nang mga police ang mahibalik ngadto sa Regions 5, 6,ug 8, ug ngadto sa Davao, Cagayan de Oro, ug Cordillera. Samtang  gikalipay kini sa mga hingtungdang kapolisan, tingali unya kon ang uban kanila, mingawon na hinuon nga mobiya sa ila karong assignment, sa hinungdan nga sila ray nasayod. Aron dili magkuwang ang  kapolisan dinhi sa ato, si PRO-7 Director Albert Ignatius Ferro nagkanayon: “I believe we won’t be affected because we still have our new patrolman but we will conduct more recruitment for the new police personnel.”