llegal drugs cremation

Mokpain sa P77 milyones ang kantidad sa illegal drugs o shabu nga mitimbag og 11 kilos ang gipaubos sa distruction sa niaging adlaw sulod sa punerarya sa Cosmopolitan sa dalan Junquera dakbayan sa Sugbo.

Unsay tawag niini nga proseso nga ang gigamit nga kahimanan mao man ang crematorium nga gidesenyo alang sa patay? Tungod kay crematorium basin pwede matawag nga cremation gihapon apan dili tawo kon dili shabu nga paborito sa mahilig sa bato o shabu.

Bitaw bisan sa limitasyon sa kahimanan nakapangita og pamaagi ang Philippine Drug Enforcement Agency PDEA Regional Office VII nga makahimo sa ilang tahas sa pagguba sa illegal drugs nga nasakmit gikan sa mga nalambigit nga durogista.

Ang ilang pakig-alayon sa pribadong sektor sama sa tag-iya sa funeral parlor aron makagamit nga libre sa pagsunog sa mga kontrabando gamit ang crematorium.

Walay sayop kon makisakay lang sila sa kahimanan nga alang unta sa ubang katuyoan. Ang importante nga mission accomplished sa responsibilidad nunot sa mando usab sa presidente nga gikinahanglan nga maguba dayon ang mga kontrabando. Usa usab kini sa pamaagi nga makapapas sa duha sa uban nga gipang-recycle na ang mga drugas nga nasakmit busa mas maayo usab ang gihimo nila nga gipasaksihan gyud ang illegal drugs distruction.

Apan angayan usab masabtan sa uban ilabi na sa mga netizens nga kusog kaayong mopaghot ug manaway sa mga otoridad nga gipangtagoan na ang shabu nga gikinahanglan nga ipaagi sa proseso.

Ang korte maoy naay hurisdiksyon sa pagtugot sa illegal drugs destruction, busa dili basta basta masunog ang mga kontrabando. Moingon ang uban, nganong ang marijuana sunogon man dayon, gipasabot sa PDEA nga kanang mga ingon ani, mahimo ra kay wala may tawo nga nadakpan.

Ang dakbayan sa Sugbo gikatakdang mopalit og duha ka kahimanan nga magamit sa pagsunog sa illegal drugs. Maayo unta og mapadali aron dili na ipa-cremate ang shabu kay naa naman gyuy magamit kong mahatagan og katumanan kining tanan.