Mura'g iro nag-ilog

Makapahuyhoy sa abaga. Mao kini ang sagad gibati sa katawhan samtang nagsud-ong sa dakong away nila ni Marinduque Representative Lord Allan Velasco ug Taguig Representive Alan Peter Cayetano, kinsa nag-ilogay sa pagka House Speaker.

Taliwala sa dakong krisis nga giatubang sa atong nasud, imbes magkahugpong ang ilang mga paninguha pagsilbe-tabang sa katawhan, nagpunay hinuog away.

Sila nga tigpandayg balaod, mao na hinuoy sigeg pasundayag og kagubot diha mismo sa kaugalingon nilang tugkaran. Kaanugon sa mga tawong mibotar nila, misalig sa ilang gisaad nga katakos ug kamatinud-anon, nga sa kaulihan, gibaslan ra diayg kapakyasan.

Segun pa sa kasaligang tinubdan,  niadtong Oktubre 12, gibutang na sa puwesto si Velasco isip bag-ong House Speaker sa Kongreso human makaanig 186 ka boto gikan sa iyang mga kaubang kongresista, diin ang espesyal nga sesyon ug ang pagpanumpa didto himoa sa Celebrity Sports Plaza, Quezon City.

Sa 186 nga boto, 111 ang didto, 45 ang Zoom ug 30 ang Viber. Kon dili iapil ang boto nga nakuha sa Zoom ug Viber, dili makaabot sa hustong numero nga makapakuwalipikar sa usa ka Representante nga mahimong House Speaker. Nindot kon dunay manifesto nga ikapakitang pinirmahan sa tanang 186 nga mibotar ni Velasco. Buwahan, walay anino sa pagduda.

Apan wala makauyon si Cayetano sa gibuhat nga diskarte sa kampo ni Velasco. Niya pa, nganong didto man sa laing dapit gihimo ang maong kalihokan nga dapat adto man kini ipahigayon sa Kongreso. Busa, namulong nga ang gihimo sa iyang kaatbang, ilegal ug dili balido. Dili. Dili siya magpapuli!

Usab namahayag si Cayetano, nga sa 297 ka kongresista, 200 kanila misuporta pabor niya kon ikomparar sa kang Velasco, kinsa aduna ray 186. Pastilan, pila ba diay ang tanang kongresista nga anaa sa Kongreso nga makabotar nila? Kinsa ba nilang duha ang nagtug-an sa tinuod?

Pastilan, makapaguol sa katawhan kini ilang gibuhat. Nilang duha, ingon sa wala gyoy magpaubos. Ang gipangita sa katawhan, kahiusaan sa tanang lider sa atong nasud.

Apan silang duha, ang gipakita, kaungkagan! Daw mga gutom irong nag-ilogay sa bukog nga gipaka-Diyos.

Unta, ibakante sa Kongreso ang puwesto sa pagka-speaker ug magpili silag bag-o nga haom sa gipangitang binuotan nga pagpangatungdanan.