Matutong rumespeto’t magbigay ng kurtesiya!
May pakiusap ang Palasyo sa mga eksperto’t dalubhasa partikular sa isyu ng pandemya. Huwag pangunahan ang gobyerno sa pamamagitan ng paglalathala sa media ng kanilang mga rekomendasyon.
Baka kasi sa sobrang galing, nakakalimutan na ang gobyernong nakaupo ay inihalal ng mga tao.
At baka nakakalimutan din nila na hindi lang sila ang magaling. Na may mga dalubhasa’t eksperto rin sa hanay ng gobyerno.
Kaya itong mga adelantadong eksperto kuno, sana alam nila ang salitang kurtesiya at respeto.
Tayong mga nasa pribado, huwag naman sana tayong umasta na parang mga bastos at bida-bida.
Puwede naman kasing pag-usapan sa media ang kanilang mga pananaw o “punto de vista’’ sa pamamagitan ng “casual healthy discussion” na maituturing na isang malayang pamamahayag.
Linawin natin, magkaiba ang ibig sabihin ng “paglalathala” o publication, sa salitang pamamahayag sa pamamagitan ng diskusyon.
Sa ganitong paraan, papasok ang mga dalubhasa ng pribadong sektor para ipahayag ang kanilang mga kaalaman.
Idagdag ko na pati kanilang mga karunungan kahit pa sabihing posibleng nakahanay sa nakaraang administrasyon o oposisyon.
Ngayong panahon ng pandemya, understood naman na kapakanan ng mamamayan at publiko ang pinangangalagaan. Kaya nga nandiyan ang Inter-Agency Task Force (IATF)
Subalit may adelantadong eksperto kasi kuno sa pribadong sektor na gusto laging pangunahan ang ating gobyerno.
Samantalang puwede namang sila’y makipag-ugnayan at makipagtulungan sa pamahalaan kung talagang kapakanan ng taumbayan ang kanilang motibo.
May nakikita akong isang “pattern” o “tatak” sa sitwasyong ito. Estilong nakikita rin ng taumbayan sa mga adelantadong laging gustong umepal at laging nauuna sa media.
Pamilyar ang mga “the moves” na ito kaya naman naglalaro sa aking isipan, hindi kaya may nagagamit dito o nagpapagamit? Dahil malapit na ang eleksyon?
What do you think Presidential Spokesperson Sec. Harry Roque?
- Latest