Budget

Gibuksan na og balik sa House of Representatives ang deliberasyon sa kapin sa P4 trilyones nga nasudnong budget alang sa sunod tuig.

Kini human si Presidente Rodrigo Duterte mipatawag og special session human gisuspenso sa gipalagpot nga speaker Alan Peter Cayetano ang ilang session sa tinguha nga kapugngan ang paghulip niya sa katungdanan.

Apan sa wala pa ang gitakdang pagsugod sa special session, nagtigom ang mayoriya sa mga kongresista ug ilang gideklarar nga bakante ang pwesto ni Cayetano.

Pinaagi sa 186 ka botos milampos sila sa pagpili ni Kongresista Lord Allan Velasco isip bag-ong speaker.

Kwestiyonable hinuon ang proseso sa ilang eleksiyon tungod sa duha ka mga hinungdan. Una, gihimo ang eleksiyon samtang suspendido ang session ug ikaduha, didto gawas sa session hall sa Kongreso gihimo ang pagpili.

Apan kini daling nakurihian dihang ang kampo ni Velasco mi-ratify sa resulta sa eleksiyon nga ilang gihimo didto na sulod sa session hall niadtong Martes, unang adlaw sa special session nga gipatawag sa presidente. Atol sa ratification, ang 186 ka botos nahimo nang kapin sa 200.

Nagpasabot nga dunay mga kongresista nga nibalimbing ug nadugang sa mipaluyo ni Velasco.

Si Cayetano nga misuway pagbabag nga maratipikahan ang resulta sa eleksiyon pinaagi sa pagtrangka unta sa mga ganghaan sa session hall, wa nay nahimo gawas sa pagsurender.

Bisan gitangtang na sa pwesto mipadangat gihapon siya sa iyang "irrevocable resignation" ug buot pang patuohon ang publiko nga siya maoy hero sa nahitabo.

Matud niya dili siya buot nga dunay masakitan kay nagsugod na kuno pagpanglungkab ang mga alyado ni Velasco ug di siya gustong babuyon ang Kongreso.

Luod paninawon ang maong mga pulong gikan ni Cayetano nga maoy unang mibaboy sa Kongreso tungod sa iyang kahakog sa pwesto.

Sa nahitabo, nilutaw nga mas dunay breeding si Velasco kay ni Cayetano.

Dili hinuon ni maoy importante. Ang mas mahinungdanon mao nga unsaon ni Velasco pagdumala ang iyang bag-ong katungdanan.

Ipatigbabaw ba niya ang interest sa katawhan, labi pa sa ila unyang pagpalabang sa budget, o mosunod lang sab siya sa diktar sa mga tawo nga nagpaluyo kaniya aron makab-ot ang iyang personal nga ambisyon.

Labihan ka sensitibo sa budget alang sa sunod tuig tungod kay nagsing-abot ang eleksiyon sa 2022. Ug mao ni lintunganay nganong gusto gyud si Cayetano nga magpabilin siyang speaker hangtud mapasar ang budget.

Sayod ang tanan nga nangambisyon si Cayetano og mas taas nga posisyon ug dakong bintaha alang niya kun makaangkon og dakong pahat sa budget sunod tuig.