Krisis sa House nagwakas din
Nagpakita ng statesmanship ang dating Speaker ng Kamara de Representante na si Alan Peter Cayetano nang kusang maghain ng irrevocable resignation upang makaupo bilang Speaker si Lord Allan Velasco alinsunod sa kanilang term sharing agreement. Anang iba, “bakit ngayon lang?” Well, wika nga, better late than never.
Pinasalamatan ni Cayetano si Pangulong Duterte sa pagkakataon na makapagsilbi bilang Speaker of the House sa kanyang facebook live noong Martes. Nagpasalamat din siya sa kanyang mga supporters lalo na sa mga Kongresistang kasapi ng National Unity Party, Nacionalista Party at mga natirang supporters sa Lakas NUCD, partylist groups at iba pang partido.
Ano man ang rason niya nung una sa kanyang pagmamatigas, naisip niya sa dakong huli na kapag nagtagal ang hidwaan niya kay Velasco, mababalam ang pagpapasa kinakailangang 2021 national budget. Ayaw na ni Cayetano na magkagulo at may masaktan pang kongresista. Hinayaan na ni Cayetano na makapasok sa plenaryo ng kamara ang mga tropa ni Velasco.
Pero ang tanong, bakit sila gumamit ng dahas? Giniba nila ang pintuan ng plenaryo sa ikalawang palapag ng session hall gallery. Anyway, nangyari na ang ‘di dapat mangyari kaya, palampasin na lang.
Nag-sorry si Cayetano kay Digong kung nagkamali siya ng pag-intindi na siya ang dapat humawak sa 2021 budget hanggang ito ay maipasa. Sabi pa nga ni Cayetano, ang kamara ay isang institusyon na hindi dapat binabastos.
Aniya, puwedeng mapalitan ang mga lider ng kamara ngunit hindi dapat hayaang masira ang kredibilidad nito. Hindi mababalewala ng taong bayan ang 15 buwan na speakership ni Cayetano.
Sa kauna-unahang pagkakataon ay naitala ng kamara at ng isang Speaker of the House ang pinakamataas na trust at approval rating dahil sa magandang performance nito. Sabi nga ni Senador Ralph Recto, maiksi lang pagiging speaker ni Cayetano pero “spectacular” ang naging performance nito. Welcome na welcome din aniya ang dating speaker na bumalik sa “smaller but smarter house” .
Sabi nga “all’s well that ends well.”
- Latest
