Kausaban sa Sinulog 2021

Unsa man ang mahitabo sa umaabot nga Sinulog 2021? Kini ang nagdumiraw nga pangutana sa tanan nga naghinamhinam unta sa dakong kalihokan sa dakbayan sa Sugbo.

Sa panagtigom nga gipahigayon sa IATF ug sa kadagkoan sa Basilica Minore del Sto. Niño, nasabotan nila nga adunay mahitabo nga dakong kausaban.

Sumala ni Konsehal Joel Garganera, Deputy Chief Implementer sa IATF, nga dili na mahitabo ang kalihokan nga kanhi tambongan sa daghang mga tawo.

Hinuon mapahigayon ang traslacion diin imotorkada ang imahen sa Senyor Sto. Niño gikan sa Basilica nga ihatod sa National Shrine sa St. Josepn sa dakbayan sa Mandaue.

Apan dili na tugotan nga mosugat ang mga tawo ug moestar kini sa simbahan sa Mandaue sa dili pa dad-on sa simbahan sa Virgen sa Regla sa dakbayan sa Lapu-Lapu.

Wala nay mahitabo nga fluvial procession, inay ibalik ang imahen pinaagi sa land trip padung sa Basilica.

Wala na usay mahitabo nga solemn foot procession nga dagsaan sa bagang duot sa mga deboto.

Hinuon gipadayag ni Garganera nga ipaagi ang tanan sa online streaming diin mahimo usab makasaksi ang mga deboto sa kasikas sa Sinulog.

Gikatakdang mopagawag og official statement ang simbahan mahitungod sa kabag-ohan nga ipatuman.

Samtang posibleng himoong virtual ang street dancing diin ang mga contingents gikan sa ubang mga dapit didto nalang manukad sa pag perform sa ilang dapit.

Giklaro sa IATF official nga tentative pa lang kini nga schedule apan gikinahanglan nga masayran na sa tanan ilabi na kadtong gikan sa mga lagyong dapit aron dili makahinayak sa ilang plano.

Maayo kining maong lakang sanglit naa pa kita sa pandemiya ug delikado kaayo nga mobalik kita sa uno simbako lang kong tugotan nga mahitabo ang mga naandan nga kalihokan sa Sinulog.

Gustohon man nato nga makatuman sa atong tinuig nga panaad sa Sinulog apan lahi na karon ang panahon busa mo adjust nalang kita ug sabton nato nga kini alang sa kaayohan sa tanang katawhan.

Pangayoon nato sa Balaang Bata nga makalingkawas kita sa pandemya aron sa umaabot nga katuigan mabalik na ang atong naandan nga tulomanon sa Sinulog.