Kaluoy sa katawhan

Taliwala sa kampanya sa kagamhanang batok sa nagsakang kaso sa coronavirus disease o COVID-19 sa nasud, padayon nga misalga usab kining panag-ilog sa labing taas nga katungdanan didto sa Ubos Balay Balauranan.

Sama sa kayagaw sa bag-ong sistema sa pagsugod sa klase diin daghan sa mga module ang adunay sayop, natigaw usab ang hawanan sa House of Representatives sa panagsungag sa duha ka kongresista alang pagka-speaker.

Kapit-tuko si Kongresista Alan Peter Cayetano sa iyang posisyon pagka-speaker. Bisan pa man sa term-sharing agreement, gusto pa gihapon niyang mangamahan sa Ubos Balay Balaudanan bisan pa man kun mapupos na iyang termino.

Samtang wala usab magpalupig si Kongresista Lord Allan Velasco. Gusto niyang mosanong si Cayetano sa ilang gikasabotan nga i-turn over na ngadto kaniya ang renda sa pangagamhanan sa ubos nga bahin sa Kongreso.

Kay lagi walay maayong kapaingnan ang ilang kasabotan ni Cayetano kaniadto, ang grupo ni Velasco misirit dayon kaniadtong Lunes paghimo og sesyon. Kini aron usab pagproklamar kaniya isip bag-o nga speaker.

Butang kini nga gikwestiyon sa kampo ni Cayetano nga supak kuno sa Konstitusyon tungod kay wala gipahigayon ang maong sesyon sulod sa Kongreso. Matud pa sa kongresista sa Taguig, mayoridad sa mga magbabalaud sa Ubos Balay Balauranan anaa pa gihapon misuporta sa iyang liderato.

Niining maong kalamboan, midako na hinuon kining maong kaguliyang sa duha ka kampo.  Kini bisan pa man sa pangaliyupo ni Presidente Rodrigo Duterte nga undangon una nila ang politikanhong gubot ug unahon pagpasar ang national budget sa sunod tuig.

Unsa kahay sangpotanan niining maong kagubot sa Ubos Balay Balauranan. Hinuon kun padayon kini nga walay kasulbaran, dako ang posibilidad nga maunsiyami gayud ang pagpasar sa budget sa sunod tuig.

Basin baya unya kun mapuno na ang katawhan niining maong showdown diha sa Kongreso.

Kay basin unya kun moabot na sa punto nga magmartsa na ang masa padulong sa Ubos Balay Balauranan aron tulisokon kining mga magkasungi nga kampo.

Kini maong kaguliyang karon nagpakita lamang nga sa pulitika walay permanente nga kaalyado.

Ang permanente mao lamang ang personal nga interes sa mga pulitiko aron lagi paghakop kanunay sa gahum. Pagkaluoy gayud sa katawhan.