Dili matag-an ang kinaiyahan

Matud pa ni DENR Usec Jonas Leones, dili permanente ang pagkabanlas sa artificial nga bonbon sa Manila Bay gumikan sa balod ug sulog, kay mahibalik ra gihapon kini. Masaligon si Usec Leones sa maong pamahayag, dili sa rason nga adunay gikamingawan ang mga bonbon sa Manila Bay hinungdan sa pagbalik niini, kon dili tungod sa ilang gibutang nga engineering interventions.  Gawas kon nahinabi ni Leones ang mga bonbon, malisod hangopon ang maong pamahayag. Kay taliwala sa iyang kaanyag ug kaanindot niini, ang kinaiyahan usab mabinatokon ug dili matag-an.  Isip-isip!

Nag-una ang pasiatab

Wala kumpirmaha sa DepEd kon gikan ba gayod sa ilang ahensya ang mga distance-learning modules nga daghan ang natumbok nga sayop kay, matud pa, aduna sila’y nasuta nga mga modules nga dili gikan sa DepEd.  Kakulang sa panahon ug kadaghan sa gimbuhaton ang gipadayag sa DepEd nga hinungdan sa maong kapalpakan.  Ang DepEd man maoy nagpasi-atab nga andam na sila sa pag-abli sa saring.  Maayo tingale nga molihok lang ang DepEd sa hilom ug ang ilang kalamposan na lang maoy magdala sa kagahob. Dako’g kalainan ang pagka-arogante ug pagkamasaligon. Panghambog pa more!

Tanom hulip sa videoke

Mipagawas na og Executive Order si Mayor Ed Labella nga naghatag og ngipon sa kamanduan nga nagdili sa pag-videoke gikan sa alas 8 sa buntag hangtod alas 5 sa hapon.  Nahisagmuyô ang akong silingan niining maong kalamboan tungod kay nahinayak na hinoon siya pagpalit og bag-ong videoke sound system.

Kon nasayod pa lang kuno siya nga mao kini ang dangatan, mipalit na lang unta siya’g tanom nga naa sa kaang, kay mabaligya pa niya kon molipang.  Samot kalaay ang Community Quarantine. Saoonz!

Vaccine flavored ice cream

Tungod sa nakita nga suliran sa umaabot kon unsaon nga maseguro nga ang bakuna alang unya sa COVID-19 dili madaut, misugyot si Senador Francis Tolention nga makiglambigit ang DOH sa mga tigbuhat og ice cream aron magamit ang ilang cold storage paghipos unya sa bakuna sa COVID-19.

Niining maong sugyot, makakita na ba kaha unya ang kabataan og maninda og ice cream sa kadalanan nga gikuyogan og nurse nga maoy tigbagting sa tiling-tiling? Hayan makatilaw na unya kita’g “ice cream with COVID vaccine flavor”.  Pagkatoytoy!

Lampingasan ang DOLE??

Gisaway sa mga senador ingon man sa mga kapunongan sa mga mamumo-o ang sugyot sa DOLE nga ihikling lang una ang pagbayad ang 13th month pay niadtong naglisod nga mga patigayon.

Tanan apektado man sa pandemya apan labaw nagping-it ang mga empleyado itandi sa magpapatigayon.  Niining sugyot, makumparar nato ang sugyot sa DOLE sa mga bulak: Kon unsa ka-huyang ug ka-delikado sa kahimtang sa bulak, mao usab ka-lampingasan ug ka-walay pagbati sa maong sugyot sa DOLE. Fezteleern!