Luwas nga pagbukas sa klase

Ihatag ang tanang pagsabot ug suporta ngadto sa mga tinun-an ug dili lisodlisoron sa mga project diin kadto ra nga makaya nila nga himoon tungod sa limitasyon ilabi na karon sa panahon sa pandemiya. Mao kini ang mensahe nga gipaabot ni Dr. Salustiano Jimenez, Director sa Department of Education DepEd Region 7 atol sa akong interview kaniya.

Naggumikan kini niadtong usa ka viral video sa usa ka college student sa laing dapit nga wala na kaantos sa daghan kaayo nga demand sa mga magtutudlo.

Matud ni Dr. Jimenez nga dili siya gustong mahitabo kini dri sa rehiyon o bisan asang dapita sa nasud.

Matud niya nga kong online classes ang gipili sa tinun-an ipahaom ang tanan requirements sa online platform nga dili na kinahanglan mogawas ang bata aron makakuha og materyales sa iyang project kay bawal gihapon karon mogawas ang mga bata.

Tungod kay online ang tanan, unta magsabot ang mga magtutudlo kanus-a sila mohatag og mga activity nga dili magdungan kay maboryong intawon ang mga tinun-an og sagang.

Bisan og kusog ang internet magkayamokat gyud ang agi, apil na ang mga ginikanan nga moabag sa mga anak.

Karong panahona ra ba magkabuang ang signal sa internet busa mosakit gyud ang ulo sa mga estudyante.

Makasabot ra man unta kita nga gihimo sa mga magtutudlo ang ilang tahas. Pero intawon dili lang usab palabian ang pag-pressure sa mga estudyante.

Dili man tanan pero naa gyuy higayon nga ingon niini ang sitwasyon nga maka-depress tan-awon.

Sama nalang mo-require nga magkat-on og luto dayon videohan o mag-food vlog. Nindot kaayo kini nga online school activity kay makakat-on og luto ang estudyante ug samang higayon makakat-on pud og vlog.

Apan lahi na nga estorya kong i-require nga ipahatod sa ilang eskwelahan o sa balay ang naluto nga pagkaon kay delikado intawon kaayo dili lang sa estudyante kon dili apil na sa magtutudlo.

Kay wala ta kahibawo sa health condition sa matag usa, bisan kon ang ginikanan pa ang mohatod, it defeats the purpose sa online.

Kutob lang sa maabot dili lang sa mga tinun-an kon dili apil sa mga magtutudlo ang atong kab-oton dili na ta mogawas sa limit kay delikado pa.

Mobukas na ang klase sa Oktobre 5, unta hapsay ra ang panghitabo ug mahasubay ang tanan base sa gipangandaman sa magtutudlo, ginikanan ug mga tinun-an.

Dili bastabasta ang kaisog nga gipakita sa tanan niining panahona nga bisan naa si COVID-19 apan wala kini makapugong sa tinguha nato nga makapadayon sa pagkat-on alang sa atong kaugmaon.

Magdungan kita sa paghimo sa mga tahas alang sa luwas nga pagbukas sa klase.