Cebu City ehemplo sa kumbati sa COVID-19

Nakatala og record breaking nga tulo lang ka bag-ong kaso sa coronavirus ang dakbayan sa Sugbo niadtong nakalabayng adlaw base sa gipagawas nga record sa Department of Health.

Kini ang pinakaubos nga na-record sa Cebu City sukad sa mikuyanap ang kagaw pito ka buwan na ang nakalabay diin usa ka higayon niana ang syudad ang nahimong epicenter sa COVID-19.

Dinhi nakatutok ang mata sa tibuok nasod diin giisip gani sa ubang mga dapit ang Cebu City nga “Covid Land” kansang mga tawo giisip usab nga “The Walking Virus” tungod sa kadaghan sa mga nataptan sa balatian.

Usa ka higayon ang dakbayan sa Sugbo gikaintapan, apan kinsay magdahum nga mamahimo kining sumbanan karon sa ubang mga lugar nga karon pa nagsugod sa pagtuyhakaw ang mga virus.

Haum ra usab nga gihimong kapanaminan ang kasinatian sa dakbayan gikan sa tungason kaayo nga kombate batok sa walay nawong nga kontra apan sa hinay hinay nakasugakod ug nakahimo sa pagpakgang sa pagkuyanap sa kagaw.

Kong nahimo sa Cebu City ang pagkumbati sa virus, mahimo usab kini sa ubang dapit sa nasud kong gamiton nila ang protocol nga atong gigamit dinhi.

Wala pa man hingpit naangkon ang kadaugan batok sa COVID-19 apan nakab-ot na nato ang kalamposan sa pag flattened sa curve niini ug nahimo kini tungod sa kooperasyon sa tanan, kadtong mga gahi og uli napahumok tungod sa pagdumala sa mga nangatungdanan.

Taliwala sa mga pagsaway nga naangkon sa mga opisyal sa syudad ilabi na ang mayor apan wala siya motumpang inay padayon nga mihimo sa iyang trabaho. Dili man sayon ug ingon ana kadali apan nahimo kini. Bisan pa man og napaubos sa Cebu City ang kaso sa COVID-19 pero dili gyud kita angayan moluag sa atong bakus aron dili mahatagan og kahigayonan ang virus nga makabangon ug makapasanay og balik.

Mas maayo nga mas pahugtan pa ang atong pag-amping, sama sa giingon sa mayor nga isipon gihapon nato nga anaa kita sa ECQ bisan og naa na kita sa GCQ aron mas magmatngon kitang tanan.