Sulondong kinaiya ni Job

Usa ka higayon, miabot ang mga anak sa Diyos aron mangatubang sa Ginoo. Mikuyog si Satanas. Busa, gipangutana kini: “Nakamatikod ka ba sa akong suloguong si Job?

Walay sama niya sa kalibotan sa katarong ug kawalay sala. Usa siya ka tawong may kataha sa Diyos ug nagsalikway sa dautan.”

Apan misumbalik si Satanas pagpangutana: “Nataha kaha si Job sa Diyos nga walay hinungdan? Wala ba nimo siya palibotig panalipod, ang iyang banay ug ang tanan niyang nahuptan?

Gipanalanginan nimo siya ug gipalambo. Pero bakyawa ang imong kamot paglaglalag sa tanan niyang naangkon. Makigpusta ko nimo. Nawngon ka niya pagtunglo.”

Mitubag ang Ginoo kang Satanas: “Hala, sige! Ang tanang iyaha naa sa imong gahom. Apan ayaw siya mismo hilabti.” Ug mipahawa si Satanas sa atubangan sa Ginoo.

Tuod man, gihutdan si Job sa mga kalibotanong bahandi nga naa niya. Gikan sa iyang mga binuhing kahayopan, ginsakpan ug lakip na mga anak, gisakmit-patay sa yawa.

Sa tumang kaguol, gigisi ni Job ang iyang sapot ug gikiskisan (shaved) ang ulo. Mihapa sa yuta ug misimba-namulong: “Hubo ko nga migawas sa sabakan sa akong inahan, hubo sab ko nga mobalik. Ginoo ang naghatag, Ginoo sab ang nagbawi. Daygon ang Iyang ngalan!” (Job 1:20-21)

Ning panahon sa COVID-19, ang mga dagkong pagsulay nga naagian ni Job, nasinati sab sa tanang katawhan.

Daghang katigayonan, kapanginabuhian ug kinabuhi ang gipangsakmit. Ug gumikan niini, daghan ang naghikog, padayong nangurakot ug nanghimaraut sa Ginoo.

Dili sama ni Job. Nga bisag gikuhaan na sa tanan niyang iyaha human hatagig kahigayonan sa Ginoo ang yawa pagguba sa kinabuhi ni Job aron kasilagan ang Diyos, wala gyod mausab ang iyang hugot nga pag-ila, pagsalig ug pagsimba sa atong Manluluwas. Nagpabilin iyang kalig-on nga nakapaminghoy sa yawa.

Maayo unta, nga ning giatubang tang makalilisang pandemiya, sundon nato si Job. Bisag unsaon pa pagkastigo sa COVID-19 atong kinabuhi, nga maoy paagi sa yawa aron kita mahimulag sa Ginoo, dili ug dili gyod ta mobiya Kaniya. Hangtod sa atong kamatayon.

Busa, sa mga na-depressed, kining dakong krisis nga atong nasinati karon, iyaha-mugna sa yawa. Dili ta magpalupig. Kinahanglang kita ang modaog aron premyohan ta sa Ginoo og langit.