Dili kaayo ta mosuroy

Husto gyud kaayo ang hukom sa Inter-Agency Task Force (IATF) nga gipabilin usa nila nga ubos sa modified general community quarantine (MGCQ) ang Cebu City ug ang ubang mga dapit sa Sugbo.

Tinuod, pagkakaron dili na kaayo daghan ang matakboyan og coronavirus disease matag adlaw, apan anaa lang gihapon. Kon wad-on na ang quarantine, sigurado ko nga daghan ang manggawas dayon.

Labi na tingali ang mga senior citizen nga dugay ra kaayo nga naglungotlungot nga makagawas sa tagsatagsa nila ka mga balay, sigurado nga mag-ambahan sa pagpanuroy.

Ang mga edaran na maoy dali ra kaayo mataptan og coronavirus kay kadaghanan nila naghambin na og lainlaing mga sakit ug luya na ang ilang immune system.

Busa, tukma kaayo nga ipabilin ra usa ang MGCQ samtang anaa pa ang COVID-19 nga nagpaniid lang kon kinsa ang ilang patakdan. Bisan si Mayor Edgardo Labella misuporta sa hukom sa IATF.

Kon dili pa maayo ang hukom sa IATF, sigurado nga si Mayor Labella mohangyo gyud unta kay nasayod man siya nga kon mangabli na ang mga balay patigayon molambo pagbalik ang atong ekonomiya.

Kitang tanang Sugboanon, maghiusa ta nga kon dili kaayo importante ang imong gawason sa panimalay, diha lang ta sa ato, aron nga makatabang ta sa pagpamenos sa gidaghanon sa mga kaso sa COVID-19.

* * *

Dunay hulagway nga nakuha ang mga sakop sa media nga nagpakita nga diha sa mga dapit sa Carbon, daghang tawo nga magsuroy-suroy na lang nga walay maskara sa ilang nawong.

Awhagon nako ang kapolisan ug ubang enforcement units nga pangdakpa na, unya itanggong gyud ug pila ka oras aron motagam. Dili man katuohan nga wa sila masayod nga gidili ang pagsuroy-suroy nga walay facemask.

Nagpasabot nga kining maong mga tawo, gahi ra gyud kaayo pasabton. Tingali ang pagdakop kanila ug pagtanggong bisan pila lang ka oras, o kaha pamultahon tungod sa wa pagtuman sa ordinansa, makatudlo kanila og leksyon.

* * *

Uy, congrats sa banay’ng Ouano diha sa Mandaue. Giaprobahan na sa Kongreso nga ang Mandaue causeway hinganlan na og Ouano Avenue. Ipahibawo nato ni aron masayod ang mga drivers.

Ang maong karsada mao kanang 2.5 kilometer highway nga anaa sa North Reclamation Area lagbas sa 180-hectare nga Special Economic Zone sa Mandaue.

Ang paghingan sa karsada nga Ouano Avenue, pagpasidungog sa daghang mga Ouano nga nanerbisyo sa lainlaing katungdanan sa kagamhanan gikan pa sa tuig 1900.

Apil sa taas nga listahan, mao sila si kanhi mayor Pedong Ouano ug Teddy Ouano. Congrats!