Unsa atong dag-anan batok COVID-19?

Niining grabe nga pag-arangkada karon sa coronavirus disease o COVID-19 sa Pilipinas ug tibuok kalibotan, daghan gayung nausab nga mga sistema. Ug ambot kanus-a mabalik sa kanhiay nga sitwasyon kining mga kausaban.

Unang naapektohan og dako niining maong makamatay nga balatian mao mismo ang atong panginabuhian. Milyones ka trabahador tibuok kalibotan ang napugos pagtrabaho gikan sa ilang panimalay aron paglikay sa COVID-19.

Sunod nga grabe nga naapektohan niini mao ang pagtungha sa kabataan nga gipaagi na lamang karon sa distance learning kay delikado nga magtakod unya kun ipahigayon pa ang naandang klase sulod sa mga classroom.

Hasta ang mga relihiyosong panagtigum wala pasayloa sa coronavirus disease. Gani pipila ka bulan nga sirado ang mga simbahan tungod kay walay mga misa, sermon ug ubang katiguman aron paglikay sa tinakdanay sa COVID-19.

Gani, sa ubang lugar sa nasud ug dinhi sa dakbayan sa Sugbo, sirado ang mga sementeryo karong kalagkalag sa unang mga adlaw sa Nobiyembre isip pagsanong sa padayong pagpatuman sa protocol kalabot sa social distancing.

Hinuon, abli sa pagkakaron ang mga sam-ang palibot sa dakbayan alang niadtong buot moduaw sa ilang mahal sa kinabuhi nga mitaliwan na sa laing kalibotan. Apan adunay mga otoridad nga magpatuman sa mga lagda sa social distancing.

Apan mismong sa Nobiyembre 1 ug 2, magmingaw unya ang mga sementeryo palibot sa siyudad kay walay bisan usa nga pasudlon agi og paglikay nga mohugop unya ang katawhan ug magtinakdanay sa maong sakit. Kini gumikan usab sa executive order ni Mayor Edgardo Labella.

Aduna pay usa ka bulan ang mga molupyo sa dakbayan pag-adto sa mga sam-ang aron pagduaw sa ilang kabanay nga mitaliwan na ngadto sa laing kalibotan.

Tungod sa ka taas pa sa panahon, walay rason nga motiyabaw pa ang uban sa executive order.

Dako gayud tuod ang kahasol nga dala niining coronavirus disease nga mitakod na’g subra sa 30 milyones ug mipatay na’g subra sa usa ka milyon sa tibuok kalibotan. Ug padayon pa ang paghasi niini gumikan sa pagkawala pay tambal nga naimbento.

Mao nang ang ato lamang dag-anan batok sa COVID-19 mao ang relihiyosong pagsunod sa mga health protocol ug ubang lagda nga gipatuman sa kagamhanan aron malikayan ang makamatay nga balatian.