Kalbaryo sa mga estudyante

Nag-viral sa social media ang nagkadaiyang kasinatian sa mga tinun-an ug mga magtutudlo ilabi sa online nga klase.

Sa Iloilo City usa ka tinun-an sa kolehiyo ang  gikasab-an sa iyang professor tungod sa kahibay sa internet connection niini.

Giingnan kuno siya sa magtutudlo nga wala na kini labot kong hinay ang internet connection ug gidugangan pa sa pag-ingon nga mas maayong mokatkat nalang sa lubi aron makakuha og signal.

Kong tuohan lang nato dayon ang estudyante mokuninit pud sa pag-bash sa professor kay makaingon ta nga dili makatawo ang iyang gihimo.

Wala may kontrol intawn ang mga tinun-an sa internet provider busa lisod gyud kaayo ang kahimtang ilabi na seguro kong data ang gamit ug samot na kong sa pisonet.

Pero matud sa maestro nga kadaghan ug sunodsunod ang rason sa estudyante busa iya kining nakasab-an.

Kung tinuod man nga nangita lang og alibi ang tinun-an kay galisod siya sa subject, mahimo ra man seguro estoryahan og tarong kay kasab-an.

Samtang laing video nga nag-viral ang sa usa ka college student nga nangalyupo sa iyang mga professor nga hinayhinayon lang unta ang mga requirements o assignment.

Kada taudtaud nalang kuno dunay ipahimo ang mga magtutudlo busa magsige nalang og atang ang tinun-an sa mga instruction ug wala na siyay mabuhat sa balay.

Gawas pa data ra intawon ang iyang load, pobre sila nga walay ikasarang, gani self-supporting siya pero gusto gyud niyang makatapos.

Angayan pud seguro hunahunaon sa mga magtutudlo nga duna usay mga estudyante nga galisod pa sa pag-adjust sa new normal.

Bisan gani sila nga mga teachers galisod pa usab sa pag-adjust busa gikinahanglan nga mosabot ug tan-awon ang kahimtang sa mga estudyante.

Komon kini nga nagahitabo karon nga mo-message ang teacher late na kaayo sama sa alas 10 sa gabii ug ang ilang project ipa virtual submit ining ka buntag sayo.

Kinsa man intawon ang maayong laki nga tinun-an nga maka-comply nga short notice man.

Gani mag-require og mga output nga ang material kuhaon sa gawas, unsaon man pag-adto sa mga bata sa gawas nga dili pa man allowed mogawas.

Makasabot man kita nga gihimo sa mga magtutudlo ang tanan aron matudloan anga mga estudyante pero karong panahona ang pagsabot gyud ang gikinahanglan.

Gikinahanglan sabton ug agakon sa mga magtutudlo ang mga tinun-an kay lisod gyud ang kahimtang.

Sa mga ginikanan ug mga tinun-an hangyoon lang og suway ang magtutudlo kay seguradong makasabot usab sila. Magtinabangay lang gud.