Kong duna lay kapilian nga manimpalad sa kadalanan?

Gipaimbistigar ni Cebu City Mayor Edgardo Labella ang nahitabong panagtrukis sa usa ka babayeng fruit vendor ug sa sakop sa PROBE niadtong nakalabayng mga adlaw.

Nakuhaan kini og video diin nag-viral sa social media human gi upload ang video nga nangayabo na ang mga prutas sa daplin sa karsada ug ang tinubagay sa duha.

Ang duha ka mga character sa video adunay kaugalingong version sa nahitabo. Matud sa vendor nga nanginabuhi lang siya tungod kay wala na gyuy makuhaan sa ilang adlaw adlaw nga panginahanglan sanglit naa man siyay mga anak nga gibuhi.

Namasin lang siya nga makalusot kay lagi masabtan sa mga otoridad gumikan kay pandemic man ug maayo nalang naa siyay kakuhaan sa ilang panginahanglan.

Dili kuno igo ang 25 kilos nga bugas nga gikan sa City Hall busa gikinahanglan na siyang mokayod kay malunosan sila sa kagutom kong wala siyay buhaton.

Gani kataposang puhonan kuno to iyang gigamit sa tinda nga mansanas hinungdan nga nakig inilogay siya sa iyang baligya dihang kuhaon na sa probe member.

Samtang matud sa taga-PROBE nga maayo nilang giestoryahan ang tindera apan nangisog kuno nga misangpot na hinuon sa ilang panag ilogay sa sudloanan sa mga tindang prutas.

Pasangil niya nga ang tindera ang nagkisikisi aron makay-ag ang mga prutas ug ang probe personnel ang mapasanginlan ilabi na nga gikuhaan kini og video.

Gipadayag sa taga-PROBE nga gitas-an niya ang iyang pasensiya bisan gilabnotan na siya og ID ug facemask apan wala gyud siya mopasakit sa tindera tungod kay kabahin kini sa iyang trabaho.

Ang isig ka habig adunay version sa nahitabo nga gustong masayran sa punoan sa dakbayan diin ngil-ad kuno tan-awon ang  ilabi na nga adunay nasayang nga panginabuhian.

Tinuod igo ra naghimo sa iyang trabaho ang kawani sa PROBE apan usahay gikinahanglan seguro nga badlongon o papahawaon sa dapit ang naninda, mas maayo nga tan-awon ang sitwasyon sa tawo.

Syempre adunay gigamit nga puhonan nga gikompra anang ginegosyo busa manalipod gyud ang naninda nga dili makarga ang iyang baligya ilabi na kong inutang kini.

Matud sa mayor nga karong panahon sa pandemic mahimo ra seguro nga luagluagan ang pagbadlong sa mga gagmayng negosyante sa kadalanan diin ipatigbabaw ang humanitarian consideration.

Badlongon lang ug dili lang kompiskahon ang mga baligya kay bisan ginagmay ra kana pero dako na kaayo na sa mga nanginabuhi kay diha intawon gikuha ang ilang ibuhi sa pamilya.

Dili lalim nga mamasin ka sa pagpamaligya, kabalaka ug kahadlok ang gibati nga basin madakpan apan wala siyay kapilian kay ang iyang pamilya gipanggutom na.

Unta sabotsaboton lang aron dili mosangpot sa initay nga panagtubag nga moresulta na hinoon sa panghitabo nga dili maayo.

Karong panahona sa pandemic nga ang tanan gipanggutom sabton lang seguro sad ang sitwasyon, dili ko moingon nga i-tolerate sila kon dili badlongon lang, papahawaon apan dili lang suwayan og imbargo ang baligya kay nakataya niana ang ilang kinabuhi.