Moody ra gyud

SEPTIYEMBRE 27, 2020:  Ikakawha'ag

unom nga Domingo sulod sa tuig

Mga Pagbasa: Ez. 18;25-28/Sal. 125/

Fil. 2;1-11/Mt. 21;28-33

Kini ang atong mahulagway sa mga tawo kang kansang taras mag-usab-usab segun sa ilang mood nga mamahimong maapektuhan sa mga stimuli nga ilang nasinati o nasugatan. Bisan pa man kun duna kausaban sa mood apan ang kahiladmang bili sa matag tawo magpabilin sa gihapon nga sa ato pa, ang kahiladman sa matag tawo mamahimong makita ug masinati diha sa ilang panggawas nga mga binuhatan o linihokan.

Sa atong ebanghelyo karong atong nakita nga at first nibalibad ang maguwang sa hangyo sa iyang amahan. Kun buot hunahunaon kaniadto dili mahimong mobalibad ka sa imong amahan sanglit patriarchal ang katilingban kaniadto nga sa ato pa,nakasentro sa amahan. Kun kini nakasentro sa amahan ang tingog sa amahan pagaisipon nga balaod u gang pagbalibad sa amahan usa man ka dakong kalapasan.

Dugang pa gipaabot nga ang maguwang kinahanglang motuman gyud sanglit siya man ang next in line sa iyang amahan. Ang manghod nahimong magpa good shot pinaagi sa hinanaling pagsanong atubangan tingali sa mga saksi apan sa kaulahian wala magtamod sa kamandoan.

Gitataw ni Jesus nga mas makasulod pa sa gingharian ang mga kobrador sa buhis ug ma makasasala kaysa mga tawo nga nagtuon sa balaod ug sa mga pariseo. Kini tungod kay sa dihang giwalihan silang Juan Magbubunyag, nagdumili gyud sila sa pagtubag dili sama sa mga konbrador sa buhis ug mga makasasala nga nahimong nagmanggihatagon sa ilang kaugalingon sa maong tawag sa kabag-ohan.

Mahimong moody ra gyud ang si bisan kinsa apan tinguha sa pag-usab wala man mag-agad sa mood kondili kinahanglang permanente kini nga tinguha taliwala sa mga nag-usab usab nga pagbati ug  panlantaw sa kinabuhi.

Mahimong mo detour kita sa makadaghan samtang gihimo nato ang atong panaw sa kinabuhi apan tinabangan sa grasya sa Dios ang tanan moabot ra gyud sa iyang padulngan nga mao ang kinabuhing walay katapusan. Kay ang tanan possible alang sa Dios. Let God be God and let ourselves be ourselves!