EDITORYAL - Dolomite sa Manila Bay

Dako kaayong isyu para sa uban ang bahin sa white sand beach sa Manila Bay ug ang dolomite mineral gikan sa Cebu. Didto sa kaulohan ang mga kritiko sa gobiyerno mialegar nga makadaut sa baga sa tawo ang dolomite, kay kuno mas maayo pang gigamit ang milyones nga pundo sa gobiyerno sa maong proyekto sa pagtabang sa mga naapektahan sa pandemiya sa novel coronavirus disease (COVID-19).

Gani dunay nahitabong fish kill didto nga dali sab  kaayong gipahid sa maong proyekto. Apan dunay nag-ingon nga gikan kadto sa mga sapa.

Butang nga gipistahan sa mga netizens mga kontra ug sa mga uyon sa maong proyekto.

Dinhi sa Sugbo, may kwestyon sab kabahin sa legalidad sa pagkubkob ug pagbaligya sa dolomite sa lokal nga merkado kay ang kasabotan sa minahan ug sa gobiyerno pang export lang kini.

Nahibaw-an sa Kapitolyo nga gibaligya na sab diay kini sa lokal nga merkado maong mikisi-kisi ang lalawigan tungod kay kini gikan man sa lungsod sa Alcoy.

Tingali ang sa Sugbo nga isyu may kalabotan kini sa balaod ug sa kasabotan sa minahan ug sa gobiyerno, lain pa ang isyu bahin sa kaluwasan sa mga molupyo duol sa minahan.

Apan ang sa kaulohan, gikwestyon ang environmental concerns sa proyekto.

Apan ilimod man o dili nasakyan o gisakyan na kini sa politika.

Nganong di man tan-awon kung unsay mas dako og kaayohang makuha sa maong proyekto? Mipasalig man ang mga nagpaluyo sa proyekto nga luwas kining pagbudbod og dolomite sa Manila Bay, hangtud nga way makita nga makadaut kini sa kadagatan didto, maayong ipadayon.

Pinaagi sa dolomite nalimpyo tan-awon ang kaniadto luod kaayong  Manila Bay nga gitambakan og basura sa mga tawo didto. Wa may laing angay pasanginlan kinsay naghugaw-hugaw sa maong kadagatan kondili ang mga taga Manila ug mga silingang mga lungsod ra, alangan naman og nga taga Cebu o taga Davao.

Busa, karon nga nalimpyo na ang lugar, maayong suklian sab kini sa mga tawo didto og kaayo pinaagi sa dili na pagpataka og labay sa ilang basura diha sa mga kanal ug kasapaan.