Gidalo ang ayuda

Wala mahatag sa DSWD ang mokabat P10 bilyones nga ayuda alang sa 4 milyones unta ka pamilya nga apektado sa COVID-19 nga gimando unta sa Bayanihan Law.  Rason pa sa DSWD nga namenosan ang gidaghanon sa mga benepisyaryo human matino nga nakadawat na ang uban sa hinabang sa ubang programa sa gobyerno. Nag-awas-awas ba gud diay ang hinabang nga nadawat sa katawhan? Sagad baya nga mulô mao nga padul-anay ra sa luwag ang sistema sa DSWD.  Apan nasagmuyô gihapon ang akong silingan kay bisan kuno nagbitbit na siya og luwag, gilabyan lang gihapon siya sa naghatud sa ayuda. Rodrigo, malooy ka!

Paghot lang una ‘ta

Sa iyang labing unang pakigpulong sa United Nations General Assembly, gipahimug-atan na ni Presidente Duterte ang kadaugan sa kaso nga gipasaka sa Pilipinas batok sa China mahitungod sa pag-ilog sa mga teritoryo diha sa South China Sea.  Senyales na ba ang maong pagpadayag sa giingon sa ulohan sa drama nga “Kon Mosukol na ang Dinaug-daug”? O sama lang ba kini sa saba nga agong nga walay tataw nga mensahe nga madungog gawas sa kinanaas?  Abangan ang susunod na kabanata!

 Pulos lang “give you”

Human giluagan ang mga lagda sa pagbiyahe sa mga healthcare professionals ngadto sa laing nasud, malaumon gihapon si Presidente Duterte nga magpabilin ang mga Filipino health workers sa Pilipinas aron padayon nga motabang sa pagbatok sa COVID-19 pandemic. 

Mulô sa mga health workers ang kakulang sa benepisyo ug kagamay sa ilang sweldo dinhi sa Pilipinas taliwala sa mga pagdayeg kanila ug sa ilang sakripisyo.  Dili sila mabasol kon molalin sa ubang nasud.  Matud pa bitaw sa akong apohan, “Sige lang “GIVE YOU, wala’y GIVE ME”.  Bitaw sad no!

 Daw kokak ang panawagan

Namahayag si William Villaber, sekretarya sa usa ka NGO, nga ginganlan og Knight of Stewards of the Sea nga ang pagmina sa mga bato nga dolomite sa lungsod sa Alcoy, Cebu, nakaguba sa marine ecosystem ug nakapuhag sa mga kabukiran sa maong lugar. 

Dugay na man intawon ang maong minahan sa Alcoy.  Kon aduna ma’y maguba nga kagasangan, hagbay ra’ng nahitabo ug ang hulga ni Villaver wala na’y kapuslanan. Gibalik-balik ra ang ilang panawagan nga daw tingog sa mga baki sa basakan; pulos kokak ang mabatian.  Too late da hero na pud!

 Mapagan ang sibilyan

Human akusahi ang opisyal sa LTO sa alegasyon nga adunay kurapsyon nga nahitabo sa iyang buhatan, misumbalik ang maong opisyal sa  pag-akusar usab sa mga dagkong magpapatigayon sa mga motorsiklo nga maoy nagpasiugda sa paghugaw-hugaw sa iyang ngalan sa tuyo nga paundangon siya sa iyang gisugdan nga imbestigasyon.

Kon adunay magnilabayay og lapok, ang mga miron sa daplin mapiskan usab.  Sa kapulihay, serbisyo sa katawhan ang malangan. Pagan na sad ang sibilyan!