Nangita'g husay

Usa sa labihan ka balido nga punto nga gipasupot ni Gobernador Gwen Garcia dihang miatubang siya ug ang iyang igsuon nga si Deputy Speaker Pablo John Garcia sa media niadtong Huwebes aron pagpangayo og katin-awan gikan sa mga tagdumala sa tambalanan ug sa mga doktor nga nag-atiman sa ilang duha ka igsuon nga namatay, mao ang labihan ka mahal nga bayranan sa hospital.

Miabot og kapin sa P8 milyones ang ilang nabayran sa tambalanan sulod sa usa ka buwan apan namatay gihapon sila si Barili mayor Marlon Garcia ug kanhi Dumanjug mayor Nelson Garcia.

Namatikdan sa pamilya nga labihan ka mahal sa presyo sa mga tambal ug serbisyo.

Nunot niini, nakapangutana ang gobernador og nganong daw sa nagpatuyang ang tambalanan sa ilang presyo. Ilang gitandi ang nagasto sa pamilya sa konsehal sa Liloan nga namatay pud sulod sa samang tambalanan nga mas minus og nabayran apan niabot gihapon og kapin sa milyon.

Matud sa gobernador nga niining panahon sa pandemya gikontrolar sa gobyerno ang presyo sa mga nag-unang palaliton.

Apan salikwaot nga ang mga tambalanan daw sa gipasagdan nga magpaturagas sa presyo sa ilang tambal ug serbisyo.

Tingali angayang tan-awon sa atong mga magbabalaud unsaon nga mabadlong ang pagpatuyang sa mga tambalanan.

Kun mahimo sa gobyerno ang pagpatuman og price ceiling sa mga nag-unang panginahanglan sama sa pagkaon panahon sa krisis ug katalagman, tingali mahimo sab nga mabadlong ang mga tambalanan nga dili magpahimulos panahon sa pandemya.

Dili ikalimod ang tataw nga pagpahimulos sa ubang tambalanan.

Gani sentro ni sa imbistigasyon sa Kongreso ug sa Department of Justice ang gidudahang panagkonsabo sa mga tambalanan ug sa Philippine Health Insurance Corporation o Philhealth.

Sigurado ko nga daghan pang pamilya nga sama og gidangatan sa managsuong Garcia ang nangita sab og husay apan way igong kaisog ug kusog nga mopadayag sa ilang gibati.

Nitingog na hinuon ang tambalanan ug mitanyag nga andam silang makig-dialogue sa pamilya.

Apan alang nako mas maayong daygan nila ang publiko sa mga punto nga gipasupot sa pamilya labi pa sa isyu sa pagpaburot sa presyo sa tambal.