Kalangay pagsul-ob sa facemasks
Kon labihan man diay kamapuslanon sa facemask sa kampanya batok sa pandemya sa Covid-19, nga ang tagduma sa Centers for Disease Control and Prevention sa Estados Unidos nga si Dr. Robert Redfield nihulagway ini nga mas kasaligan kay sa wa pa mamugna nga bakuna, nganong dugay mang gipatuman ang mga lagda sa pinugsanay nga pagpasul-ob sa tabon sa baba ug ilong?
Ang mubong tubag mao ang kakuwang og kasayoran sa unang mga semana sa pagkatap sa kagaw. Gani, bisan karong mas daghan nang kasayuran duna gihapoy nagdumili pagsul-ob ini.
* * *
Sa sinugdanan, nanagana sab ang World Health Organization (WHO), ang nangu sa kalibotanong kampanya batok sa Covid-19, ug ang US CDC sa pagdason sa gihimo sa pipila ka nasud nga pagpugos sa ilang mga molupyo sa pagsul-ob og facemasks.
Nipasabot ang mga espesyalista sa WHO ug US CDC, nga gihangad sa ubang kanasuran sa talagsaon nilang katakos ug kalapad og kasinatian, nga ang angay rang mag-face mask mao ang mga doktor, nurses ug ubang health workers ug mga masakiton ug mga sakop sa pamilyang nag-atiman sa mga masakiton.
* * *
Boluntaryong nisul-ob og facemasks bisan wa pay lagda sa kagamhanan ang mga molupyo sa China, Hong Kong, Singapore, Taiwan ug South Korea. Nganong mas nag-una man silang nakaagpas sa hulga sa lapad ug paspas nga tinakdanay sa kagaw?
Kay pulos sila nakasinati sa Severe Acute Respiratory Syndrome (SARS) 17 ka tuig ang nilabay. Maong silay labing andam pag-apud-apod og face masks sa kabos ug masakitong mga molupyo ug pagpalambo sa ilang mga tambalanan.
* * *
Niinsistir ang WHO nga way asymptomatic carriers--way mga timaan sa sakit apan nataptan sa kagaw ug nanakod sa mas daghan kay giisip nga presymptomatic ang mga pasyente, mopakita ra sa kapulihay og mga timaan. Karon wa nay lalis. Niangkon nang WHO nga 80% sa natakdan asymptomatic.
Nga gituohang mas nidaghan pa sa pagkakumbinser sa kanasuran sa kapuslanan sa face masks. Nga sa wa pa ideklarar nga mas epektibo kay sa bakuna, giila na nga pasiunang bakuna--kay nakaiban sa gidaghanon sa kagaw nga nitapot sa pasyente ug busa igo rang nakapalihok sa immune system sa way pagpakita og grabeng mga timaan sa sakit.
- Latest
