Tulda kuhaa usa

Pagkakaron, angay’ng ipadaplin lang usa kanang mga tulda nga gibutang sa mga karsada nga may police checkpoint kay mora’g wa may pulos.

Wa gyud ko makakita nga dunay mga motorista nga gipabalik kay wa makatuman sa gilatid nga kinahanglang kompleto sila sa mga quarantine passes, ug uban pa.

Masabot nga ang mga polis nga gidestino diha, igo na lang nagbarug-barog isip pagtuman sa mando kanila. Diha nga miadto ko sa Mandaue niadtong Huwebes, ang tulo ka polis nga nagbantay sa checkpoint sa Barangay Kasambagan, didto ra sa tent nagsige’g text.

Ang tulda nga ilang giestahan pwerteng dakoa nga giukopar gyud ang katunga sa karsada. Husto gyud ang obserbasyon nga ang maong mga tent, nakabalda na hinoon sa pag-agi sa mga sakyanan.

Mao nga kay wa na may gihimo ang mga polis nga nagbantay diha, kuhaon na lang na.

Kon kuhaon ang mga polis nga nagbantay diha sa mga checkpoint areas, mahimong magamit pa sila sa ubang mga gimbuhaton nga mas mapuslanon pa ngadto sa publiko.

* * * 

Nadugangan na usab ang gidaghanon sa mga modernized PUJ nga gihatagan og pagtugot sa LTFRB nga mobiyahe sa lainlaing mga rota dinhi sa mga dapit sa Metro Cebu.     

Kining mao nga mga modernized PUJ, ang porma niini mora’g mga gamay’g diyutay sa bus, ug mao na kini ang pabiyaheon sa LTFRB kay anam-anamon na nila’g wagtang ang mga traditional PUJ’s, kadtong mga karaan.

Para kanako, nindot man, apan mentras tanto, angay’ng hatagan lang tingali og pagtugot kadtong mga dagko nga PUJ ug mga nindot pa, sama sa mga ELF nga gihimong pasaheroan.

Balikon nako nga ang angay’ng i-phase out mao kining mga gagmay kaayong PUJ kay lisud kaayo sa mga pasahero, mag-abot ang mga tuhod ug mapakong ka pa kay mubo kaayo.

* * *

Giawhag gyud ni Mayor Edgar Labella ang kadagkoan sa MCWD Board nga gipangulohan ni Atty. Joey Daluz III nga pangitaan gyud og sulbad ang kanihit og tubig sa ubang mga dapit dinhi sa siyudad sa Sugbo.

Matud ni Mayor Labella nga nasayod siya nga wa gyud makatuman ang MCWD sa iyang katungdanan nga pag-supply og tubig sa tanan unta nga mga dapit sa dakbayan.

Gipasabot ni Mayor Labella si Konsehal Daluz nga mauwaw siya sa katawhan kon dili makatuman ang MCWD sa ilang katungdanan, bisan karon nga nagsugwak na ang tubig sa duha ka dam sa MCWD sa Jaclupan, Talisay ug sa Buhisan, Dakbayan sa Sugbo.

Daku kining hagit kang Atty. Daluz nga iya gyud nga himoon ang tanan niyang mahimo aron molambo ang water district nga iyang gidumala.