Paturagas sa DOTr

Nagsalimoang ang mga lagda sa kagamhanan unsaon hingpit nga masalbar ang ekonomiya ug mapugngan ang padayong pagpanakod sa COVID-19.

Bisan sa pabiling hulga sa COVID-19 napugos ang atong gobyerno pag-abli og balik sa ekonomiya tungod kay wa nay igong pundo’ng magamit paghatag og hinabang.

Dungan sa paglugak sa mga quarantine status sa matag syudad, lungsod ug probinsiya mao ang pagpangabli og balik sa mga balay patigayon.

Lainlain ang paagi nga gibuhat sa mga lokal nga opisyal aron pagpalambo og balik sa dagan sa ekonomiya sa ilang tagsa-tagsa ka dapit.

Usa sa labing importanteng kabahin pagpalambo sa ekonomiya mao ang transportasyon.

Apan tungod sa pandemiya pabiling gikontrolar sa atong gobyerno ang dagan niini. Limitado pa ang gidaghanon sa makabiyahe ug kinahanglang mosubay sa mga health protocols aron paglikay sa tinakdanay.

Usa sa mga health protocols nga napruwebahan nang epektibo batok sa COVID-19 mao ang “social distancing.”

Gipatuman ni bisan diha sa mga pampublikong sakyanan. Apan sugod niadtong Lunes, gipamub-an sa Inter-agency Task Force ang usa ka metro nga distansiya.

Aron kuno mas daghan ang pasahero nga makasakay ug malikayan nga dunay matanggong diha sa kadalanan.

Ang maong lagda gisupak sa grupo sa mga doktor didto sa kaulohan.

Bisan ang mga membro sa gabinite ni Presidente Rodrigo Duterte nabahin sa maong lagda.

Dili tinuod masabot unsay matang sa lohika nga gigamit sa Department of Transportation sa pagrekumendar niining maong lagda.

Kun buot sa DOTr nga di magkuwang ang pampublikong sakyanan nga mohakot sa mga pasahero, dili ang lagda sa social distancing maoy angayang isakripisyo.

Ang angayang buhaton sa DOTr mao ang pagtugot og dugang mga pampublikong sakyanan nga makabiyahe apan ipabilin ang usa ka metro nga distansiya sa matagpasahero aron malikayan ang tinakdanay sa sakit.

Gani mismong ang grupo sa mga transport operators ug drivers maoy nisugyot niini.

Mismong ang transport sector nasayod sa kamahinungdanon sa social distancing ug sila wala mag-apas sa daghang pasahero ug dakong kita.

Angayang sundon sa DOTr ang sugyot sa transport sector tungod kay sila maoy mas labaw’ng nasayod sa ilang kahimtang inay nga magpaturagas sa ang gusto.