Bisita mo daan sa sementeryo

Sa unang higayon sa atong kasaysayan, magmingaw ang mga sementeryo palibot niining dakbayan sa Sugbo inig abot na unya sa All Saints’ Day ug All Souls’ Day o ang matag tuig nga tradisyon sa kalagkalag kanatong mga Kristiyanos.

Kini gumikan usab sa order sa lokal nga pangagamhanan sa siyudad nga nagdili sa katawhan pagtapok sa mga sementeryo sa dakbayan isip kabahin sa pag-obserbar sa health protocols kabahin sa social distancing.

Sa iyang executive order, si Mayor Edgardo Labella mimando pagsira sa mga sementeryo sa dakbayan gikan sa Oktubre 30 hangtud sa Nobiyembre 3 aron kalikayan ang pagdagsa sa mga tawo. Kini aron dili masupak unya ang lagda sa physical distancing.

Hinuon, sukad paggawas sa maong mando ni Labella, wala ko makabasa o makadungog nga adunay mibabag niini gikan sa katawhan. Gani ang Simbahang Katoliko miuyon man sa maong executive order kay lagi alang man kini sa kaayohan sa katawhan.

Nasayod kita nga nagkagamay na ang bag-ong mga kaso sa COVID-19 sa siyudad human nga gipatuman ang higpit nga lagda sa panglawas. Ug angay lamang ma-maintain kini kun gusto kita nga magmadaugon batok sa coronavirus disease.

Ilalum sa atong tradisyon, ang mga sementeryo maoy mag-una natong destinasyon matag kalagkalag aron pagbisita sa mga mahal sa kinabuhi nga mitaliwan. Tungod sa bagang duot sa katawhan, peligro ang tinakdanay sa COVID-19.

Bisan pa man kun supak sa kabubut-on sa uban, insakto lamang ang executive order ni Labella pagsira sa tanang sam-ang sa dakbayan atol sa kalagkalag. Kay kun tugotan ang gatusan ka libo nga modugok sa mga sementeryo, dili ko ka-imagine sa dakong risgo sa exposure sa maong makamatay nga sakit.

Gituyo pag-isyu og sayo ni Labella ang maong order aron makapangandam ang mga lumulupyo sa siyudad. Puwede pa silang mobisita daan sa mga sementeryo, samtang aduna pay panahon. Ang importante nga mosunod gayud ang matag usa sa lagda alang sa kalamposan sa krusada batok sa COVID-19.