Maayo lang sa pag panaway

Nagpabiling init nga isyu ang pagpaninot sa Manila Bay tungod sa pag gamit og dolomite nga maoy gitambak sa baybayon didto aron masusama sa white sand beach pareho sa Boracay.

Multimillion pesos ang gigahin sa naasoy’ng proyekto nga maoy nakapasaka sa kilay sa mga kritiko niini. Matud nila nga dili tukmang panahon karpn nga gastohan og dakong salapi ang pagpanindot sa Manila Bay kay naa kitay giatubang nga dakong problema sa pandemiya.

Ang kwarta kuno nga gigamit niini maayo nalang nga mahiadto sa programa sa covid intervention kay daghan kaayong naapektohan.

Pastilan daghan kaayo ang nag-apil-apil sa isyu nga nagpakaeksperto mahitungod sa proyekto sa DENR, duna pay niingon nga dili luwas sa panglawas sa mga tawo ang dolomite.

Dinhi nato makita ang ka negatibo sa panglantaw sa uban mahitungod sa proyekto. Apan asa man sila dihang mas baho pa sa patay ang Manila Bay, biologically dead na gani seguro kini kay hilabihan ka hugaw kaniadto.

Tungod sa ka hugaw gidid-an na ang mga tawo sa pagkaligo kay peligro sa taas nga coliform content.

Duna bay gihimo kining mga kritiko sa pagsalbar sa namatay nga Manila Bay? Seguro kutob lang sa ginagmayng cleanup drive.

Ang kasamtangan nga administrasyon ang dunay itlog sa paghimo og kongkretong solusyon aron ma-revive ang Manila Bay nga hagbay nang patay.

Dili lang sa revival kun dili gipanindot pa kini nga mahimong kapahimuslan sa tanan kay dili naman kinahanglan nga moadto sa Boracay kay naaa naman sa Manila Bay, dili hinoon white sand apan ang kapution pwede na.

Naay senador nga gustong ipahunong ang proyekto kay naa pa kita sa pandemya, pastilan dili na gyud diay pwede mohimo og lain ang uban ug gikinahanglan nga motutok tanan sa COVID-19.

Ang DOH, DSWD, UG ang DILG ang mga ahensya nga nagtutok sa COVID-19 ug naa na silay mga pundo alang niini.

Samtang ang ug ang government agency sama sa DENR naa puy mga programa nga gikinahanglang himoon.

Dili mahimo nga mohunong nalang ang tanan tungod sa virus kay naa pay uban nga gikinahanglan nga atimanon.

Usik man sad kaayo nga dili na ipadayon ang pagpanindot sa Manila Bay kay nagastohan na kini og salapi sa katawhan.

Ayaw ko ingna nga apil ang pondo sa ubang ahensya gamiton batok sa covid, daghan na kaayo mausika ug posibleng mahiadto lang sa bulsa sa mga kurakot.