Kasihag ug pagmaniobra sa bakuna
Ang pagkahunong karong semanaha sa clinical trials sa AstraZeneca sa ilang bakuna batok sa COVID-19 tungod sa pagkasakit sa usa sa mga boluntaryo nga ilang nabakunahan sa Britanya di maoy una. Nahunong na sang pagtuon niadtong Hulyo kay nasakit sab ang laing boluntaryo.
Nakaplagan nga ang pasyente niadtong Hulyo nga may multiple sclerosis nasakit nang daan sa wa pa mabakunahi. Ang transverse myelitis (paghubag sa spinal cord) nga maoy gikatahong nitakboy sa laing pasyente karong semanaha gisubay pa sa independenteng mga eksperto kon direkta bang nahilambigit sa bakuna.
* * *
Nilungtad og pila lang ka adlaw ang unang pagkahunong sa pagtuon sa bakuna sa AstraZeneca niadtong Hulyo. Kining ikaduha nga pagkahunong, kon mapamatud-an gihapon nga di tungod sa bakuna, gipaabot nga molungtad og usa ngadto sa duha ka semana.
Apan kon mapamatud-an sa mga eksperto nga may kalambigitan ang bakuna, ang kalangay sa clinical trials mahimong molungtad og pila ka buwan. Makapadayon ra gihapon kon matino nga way laing pasyente nga naapektahan. Apan kon mahibaw-an nga nameligro ang mas daghang pasyente sa samang hulga, mahimong mabasura ang Oxford vaccine sa AstraZeneca.
* * *
Nipasalig hinuon ang AstraZeneca nga bisan sa kakulian dako gihapon ang kahigayonan nga maaprobahan nang ilang bakuna karong tuiga o sa sayong bahin sa sunod tuig. Di sila ray nahitaboan ini apan nabantang sa tibuok kalibotan kay sila may gitutokan tungod sa ila untang pahibawo nga may bakuna na karong semanaha.
Gipasabot sab sa World Health Organization (WHO) nga ang pagkahunong sa clinical trials sa AstraZeneca karong semanaha magsilbing pahinumdom sa katawhan nga di ingon ana kasayon ug kadali ang pagkaplag og bakuna.
* * *
Angay'ng hangpon ang kasihag sa Phase 3 trials sa mga bakuna sa mga kompaniya nga nagbase sa Estados Unidos ug sa Uropa. Ang wa pagtago sa matag lakang sa mga pagtuon makapasalig sa katawhan nga way pagpanglaktod ni pagmaniobra nga nahitabo.
Apan mingaw pa sa tirana ang clinical trials sa China ug Russia nga pulos nangangkon nang may mga bakuna bisan wa pa makasugod ang Phase 3 trials ug sa way pagpakita sa mga eksperto sa ubang kanasuran sa mga detalye sa sangpotanan sa unang mga hugna sa ilang mga pagtuon.
* * *
- Latest