President Duterte nilunok ang pride
ALAM ng buong mundo na galit si Presidente Duterte sa United States at ibinaling na ng Pilipinas ang pakikipag-alyansa sa China. Kaya lumulutang ang mga espekulasyon na ang absolute pardon kay US Marine, Lance Corporal Joseph Scott Pemberton na mula sa Presidente ay may hinihintay na sukling political favor mula sa America, bagay na pinabulaanan ni Foreign Affairs Secretary Teddy-Boy Locsin.
Magugunita na si Pemberton, isang US servicemen na nasa bansa noon bilang bahagi ng idinaos na US-Philippines Balikatan war exercise ay nasentensyahan ng pagkabilanggo sa pagpatay sa isang Pilipinong transgender na si Jennifer Laude. Noong panahon lang ni dating Panulong Noynoy Aquino nangyari ito. Parang napakabilis naman na si Pemberton ay pinalaya na.
Totoong may kapangyarihan ang Pangulo na magbigay ng clemency o pardon sa sino mang bilanggo, pero ang ipinagtataka ng marami ay kung bakit niya iginawad ito sa isang Amerikanong gumawa ng isang buktot na krimen sa Pilipinas lalo pa’t umuusok ang ilong niya sa galit sa Amerika na kanya pang minumura lalo na nung panahon ni Presidente Obama. Isa pa, galit din ang Pangulo sa mga gumagawa ng karumal-dumal na krimen na aniya’y dapat patayin agad.
Pero para kay Presidential Spokesman Harry Roque, posibleng ginawa ng Pangulo ito para mabigyan ang Pilipinas ng prayoridad sa bakuna laban sa COVID-19 kapag ito’y sinimulan nang ipamahagi ng US. Kung tama ang tinuran ni Roque, tingin ko ay hindi dapat magsalita ng tapos ang Pangulo dahil baka dumating ang situwasyon na lunukin niya ang sarili niyang salita.
Noong umaapoy pa sa galit ang Pangulo, tahasang sinabi niya na tapos na ang relasyon ng Pilipinas at Amerika. Pinahinto pa niya ang Balikatan na hindi naglaon ay ibinalik din naman. Ngayong tayo ay kasama ng buong mundong nakikibaka sa pandemia, tinitingala din pala natin ang Amerika sa dini-develop nitong vaccine at umaasa tayong mabibigyan tayo ng prayoridad.
- Latest