Virtual visit sa adlaw sa minatay?

Kong sa Manila tulo lang ka adlaw ang gimando ni Mayor Isko Moreno sirad-an ang mga menteryo, dinhi sa dakbayan sa Sugbo lima ka adlaw gyud pasirad-an ni Mayor Edgardo Labella.

Sa gipagawas nga executive order sa mayor, tak-opan ang mga sam-ang sugod sa Oktobre 30 hangtod sa Nobyembre 3 tungod kay niining mga adlawa modagsa ang mga tawo nga moduaw sa mga mahal sa kinabuhi nga gipahiluna sa mga sementeryo.

Unang higayon kini nga strictly prohibited ang pagbisita sa mga tawo sa mga sementeryo tungod sa nasinati natong krisis mugna sa pandemic.

Sakto ug haum ra gyud kining maong lakang sa atong kagamhanan tungod kay alang ra kini sa atong kaayohan aron malikay gikan sa pagtakboy sa coronavirus.

Segurado nga makasabot ra ang mga kalag nganong dili sila mabisita sa mga adlaw nga alang unta kanila tungod kay dili man nato kini kagustohan, mao kini ang gimbot-an sa kinaiyahan nga lisod alkontrahan.

Kong ang mga simbahan napahunong ang kalihokan tungod kay maghugop ang mga tawo, labaw pa kini nga okasyon kay mohugop gyud ang mga tawo nga dili na motuman sa health protocol.

Karon gani bisan sa gawas malimot naman sa social distancing samot na kon anaay mga dagkong kalihokan sama sa paghandum sa adlaw sa minatay.

Seguro pwede ra nga mo advance visit sa mga sam-ang samtang bukas pa kini pero kadto lang mga gitugotan nga makagawas sa mga balay kay kadtong mga bata ug tiguwang dili gyud tugotan nga mosulod sa mga sam-ang.

Mas maayo seguro ang local nga kagamhanan magbutang og social media team sulod sa mga menteryo aron didto mag live streaming aron usab ang mga tawo didto lang motan-aw o mahisama nga virtual visit.

Kong nahimo kini sa mga buhi, himoon usab kini alang sa paghandum sa mga minatay.