Ang magreklamo maoy sad-an

Dili na mohimo og imbestigasyon ang mga sakop sa Hunta Probinsiyal sa pagkuykoy ug pagkupog sa dolomites sa lungsod sa Alcoy ug gidala sa kaulohan kay gigamit sa pagpaputi sa naitom na nga Manila Bay.

Una niini, gireklamo ni Cebu Third District Provincial Board Member John Ismael Borgonia kinsa mao ang Chairman sa Committee on Environmental Conservation and Natural Resources ang pagdala sa dolomites nga gikan sa Alcoy, Cebu didto sa kaulohan nga wala makahibawo ang lokal nga kagamhanan sa lalawigan sa Sugbo.

Apan usa ka taas nga opisyal sa Department of Environment and Natural Resources (DENR) miingon nga dugay na ang operasyon sa minahan sa dolomites sa lungsod sa Alcoy nga may pagtugot gikan sa gobiyerno. Matud pa sa opisyal nga sala ni Borgonia nganong wala siya masayod sa operasyon sa minahan sa dolomites.

Sa pamahayag sa opisyal sa DENR, nagmukhang tanga sa tagawog pa si Provincial Board Member Borgonia.

* * *

Gipahunong sa Kapitolyo ang pagkubkob ug pagkuykoy og dolomites sa lungsod sa Alcoy human makigtagbo si Governor Gwendolyn Garcia sa mga opisyal sa DENR ug MGB.

Aron mapatuman ang kamandoan sa pagpahunong, mopagawas ang Gobernador og usa ka Executive Order.

Nganong karon pa man pahunongon sa Kapitolyo ang pagkubkob ug pagkuykoy og dolomites sa lungsod sa Alcoy?

Dili ba sulti sa taas nga opisyal sa DENR nga dugay na nga may operasyon ang minahan sa dolomites sa Alcoy?

Tungod ba kay ang pinulpog nga dolomites gidala didto sa kaulohan kay gigamit sa pagpaputi sa naitom na nga Manila Bay?

Bunga ba kini sa kasina? Gipanindot man god sa DENR ang Manila Bay.