Salikwaot, apan salamat sa COVID-19

Gipahibawo ni Mayor Edgardo Labella ang plano sa dakbayan sa Sugbo pagpakig-alayon sa Land Bank of the Philippines alang sa pag-apud-apod sa financial assistance sa mga senior citizens.

Buot ni Labella nga ipaagi sa cash cards ang pagpanghatag sa cash assistance aron malikayan ang pagdasok sa tawo nga posibleng mahimong hinungdan sa tinakdanay sa kagaw sa COVID-19.

Ubos sa City Ordinance 2453, ang tanang rehistradong senior citizens sa Cebu City makadawat og P1,000 matag buwan o P12,000 ang tuig.

Ug sulod sa katuigang nanlabay gigamit ning puhonan sa politika sa matag-administrasyon aron magpabilin sa gahom.

Kini maoy hinungdan nganong hangtud ron mano-mano gihapon ang pagpanghatag sa benepisyo.

Gusto gyud ang mga naglingkod nga mga opisyal nga mosalida hinungdan nga bisan mas sayon ug ipaagi sa ATM ang pagpanghatag sa cash assistance mas gipili nilang personal nilang idunol ngadto sa mga tiguwang.

Lisud man tinuod silang mahinumduman panahon sa eleksiyon og dili na sila makit-an.

Salikwaot, apan salamat sa COVID-19 napugos ang mga opisyal sa dakbayan pagsagop sa cash card isip paagi sa pagpang-apud-apod sa benepisyo.

Long over due na ang maong sistema. Kaniadto ra unta ni angayang gisugdan sa dakbayan aron malikayan ang kahasol sa mga senior citizens.

Tiaw mo nga kinahanglan pa intawon maglinya ug magbuwad sa init ang mga tiguwang aron lang makakuha sa ilang benepisyo?

Giulog-ulogan lang ang mga tiguwang sa dyutay’ng kantidad apan ang tinuod nahimo silang kapital sa mga politiko alang sa personal nga mga ambisyon.

Pinaagi sa cash card mas convenient alang sa mga senior citizens ang pagkobra sa ilang kwarta.

Angayan lang ipatuman sa dakbayan ang matag buwan nga validation o pag-update sa ilang listahan aron malikayan nga dunay mga patay nga padayong mokobra.

Ug mas sayon ni nga paagi kay sa maglinya ug magdasok ang mga seniors panahon sa pay out.