DOH naghahanap ba ng damay?
Binabatikos ng Department of Health (DOH) ang proyekto ng Department of Environment and Natural Resources (DENR) na paglalatag ng puting buhangin sa buong dalampasigan ng Manila Bay. Ani DOH Secretary Rosario Virgeire, masama sa kalusugan ang tinatawag na “dolomite” na ginagamit sa paggawa ng white sand kapag ito’y nakain o nasinghot.
Pero sino namang matino ang isip na kakain o sisinghot ng buhangin? For that matter, kahit anong lupa pa ang kainin ng tao ay puwedeng maging lason. Ang white sand ay ginagamit na rin ng ibang bansa sa pagpapaganda ng mga beaches nila bilang pang-akit ng mga turista. Ang puting buhangin ay hindi kayang tangayin ng hangin tulad ng alikabok para malanghap ng tao.
Maraming mga kapalpakan ang gobyerno na lagi kong binabatikos sa kolum na ito, pero ang isa sa mga pinupuri ko ay ang walang humpay na gawain ng DENR para linisin ang kapaligiran lalo na ang karagatan at mga daluyan ng tubig. Napapanahon iyan lalo na sa panahon ng pandemya.
Ayaw kong isipin na naghahanap ng damay ang DOH sa mga katiwaliang kinasangkutan nito sa panahon na may krisis tayo sa COVID-19, kung kaya naghahagilap ng ibang ahensyang maaaring batikusin.
Pero paano mo tutuligsain ang isang proyektong maganda at isinusulong ng may political will para sa kapakanan ng taumbayan? Nasabi ko na ito at gusto kong ulitin: bago pa man sumulpot ang issue sa COVID, nailatag na ng DENR ang programa sa paglilinis at rehabilitasyon ng mga katubigan. Aprobado iyan ng kongreso at pinaglaanan na ng pondo ito.
- Latest