Happy birthday, Mama!

Di kaayo particular kun maghisgot kita og endearment. Apan hinuon maningkamot gyud ko nga mo-greet sa usa ka tawo labina sa mahinungdanong adlaw sa iyang kinabuhi apil na niini ang panahon sa iyang birthday.

Dili pud nuon hataas ang akong greeting. Igo ra gyud kong moingon og “Happy birthday.” Mubo apan kinasingkasing. Mag-unsa man tuod nang taas apan kutob ra diay sa ulo-ulo.

Matag kasaulogan nga taliabot nagkinahanglan gyud og igong pagpangandam.

Sa tradisyon sa simbahan karong adlawa gisaulog ang adlaw nga natawhan sa atong mahal nga inahan nga si Mama Maria. Dinhi sa among dapit sa Madridejos, Alegria nihimo usab kami og yanong pangpangandam. Dekorasyon, pagkaon ug uban pa.

Apan ang mahinungdanong andamon mao gyud ang tagsa tagsa ka mga kaugalingon aron pinaagi ning tinuig nga paghandum unta mamahimo kaming mahisama kang Maria ug sa iyang birtud.

Alang nako mas mahinungdanon gyud ang pag-awat sa iyang mensahe ug pagsunod sa iyang gipakitang sanglitanan samtang dinhi pa siya sa kalibutan.

 Apil na niini ang iyang pagkamapamalandungon nga maoy nidasig kaniya aron mamahimong masinugtanon.

 “Matuman unta dinhi kanako sumala sa imong gisulti!” Iyang tubag uyon sa mensahe ni Gabriel nga siya mamahimong inahan sa ikaduhang persona sa Santisima Trinidad.

Dili pa lang dugay, nahimong daw sa nikisaw na usab ang giingong paghilak og dugo sa Mahal nga Birhen (imahen) nga kasamtangang nahimutang sa Lindogon, Simala.

 Kining maong panghitabo dili dayon nato hatagan og igong pagtagad ingon nga milagro. Kay ang milagro dili kinahanglang extraordinary.

 Kun mapokus lang kita sa imahen nga mohilak ingon nga milagroso sa ato pa diay ang bisan unsa nga dili mohilak nga imahen dili milagroso?

Sa laktod nga pagkasulti nakapokus na lang nuon kita sa imahen kaysa gi-represent sa maong imahen.

 Ning paagiha dili na kini pag-venerate hinunoa idolatry. Unta mas mohamtong na kita diha sa atong pagsabot kun unsa gyud kining debosyon sa atong inahan.

Alang nako, bisan pa man kun dili siya makapakita og mga katingalahang mugna ug display sa iyang gahum, padayon gihapon nako siyang mahalon isip akong inahan bisan pa man kun dunay mga higayon nga dili kaayo ako expressive sa pagpakita sa ingon.