EDITORYAL - Epektibo ug luwas

Ang World Health Organization miingon nga dili kini moendorsar og bisan unsang bakuna batok sa novel coronavirus disease kun dili mapamatud- ang epektibo ug luwas kining gamiton.

Dunay mga nasud nga tingali mosanong sa pasidaan sa WHO apan dili niini kapugngan ang ubang mga nasud nga karon grabeng naapektahan sa pandemiya ug nanagana ng daan nga makauna sa makapalit aning mga bakuna.

Mokabat na sa 26 milyones ang natakboyan sa maong sakit ug dul-an na usa ka milyon ang nakalas gikan sa nagkadaiyang mga nasud.

Bisan ang mga gamhanang nasud sama sa Amerika nagrabehan niini. Tungod sa pandemiya daghang mga ekonomiya ang nahagsa.

Kini maoy nagtukmod sa mga gobiyerno nga kubiton kining mga haylo nga nagsaad og proteksyon batok sa COVID19 bisan wa pay klaro.

Desperado na ang ubang mga gobiyerno nga makapalit aning maong mga bakuna.

Apan wa pay bakunang girekomendar ang WHO. Duna na hinuoy mga kandidatong bakuna apan wa pa makakompleto sa Phase III trials nga maoy magdesider kun epektibo ba gyud kini batok sa COVID19.

Ang Sputnik V sa Russia giingong anhi maghimo sa ilang Phase III.

Apil sa mga kanasurang miboluntaryong motabang sa research sama sa pagpa-testing niining bakuna nga ginama sa Russia ang Pilipinas.

Apan bisan pa og mapaubos ang mga tawo sa Phase III, sa normal nga panahon maabtan pa gyud og mga buwan o ba kaha tinuig ayha pa gyud siguradong makita kun epektibo ba kini o luwas gamiton.

Angay hinumdoman nga lahi ang epektibo ug lahi sab ang luwas gamiton. Mahimong epektibo ang bakuna, unya  dili diay luwas gamiton tungod duna diay negatibong epekto.

Pagkakaron, ang labing sayon ug luwas nga proteksyon mao ang pagtuman sa tanan health protocols sa mga tawo sa tanang panahon samtang wa pay epektibo ug luwas gamitong bakuna.