PH kumalas sa joint patrols ng mga kaalyadong navies
INIATRAS ang mga sundalong Pilipino mula sa joint naval exercises sa West Philippine Sea. Nilimita ni President Rody Duterte ang drills nila sa karagatang teritoryo lang, 12 milya mula pampang. “Umiiral ang utos niya sa amin, sa akin, na huwag lumahok sa naval exercises sa South China Sea, maliban sa pambansang dagat, ‘yung 12-milyang distansiya mula pampang”, ani Defense Sec. Delfin Lorenzana nu’ng Agosto 3.
Ininterbyu si Lorenzana tungkol sa pag-amin ni Duterte na “inutil” siya sa pamamasok ng China sa WPS, o 200-milyang exclusive economic zone ng Pilipinas sa SCS. Wala umanong magagawa kontra sa bansang may nuclear arms. (Ang 12 nautical miles ay 22.224 kilometro; reserbado ng batas hanggang 30 kilometro ng tubig na munisipyo para sa maliliit na mangingisda.)
Nu’ng linggong ‘yon namataan muli ang dalawang Chinese ships na nag-e-explore sa Recto Bank sa gilid ng Palawan. Naghahalinhinan ang Xiang Yang Hong-14 at Haiyan Dizhi Hao-12 sa Recto na mayaman sa langis at natural gas, anang militar. Huling nakita ru’n ang XYH-14 nu’ng Agosto 6-7, habang pabalik ang HDH-12 sa Mischief Reef na inagaw ng China mula sa Pilipinas at ginawang island fortress.
‘Yan ang epekto ng pag-atras sa joint naval patrols ng America, Japan at Australia sa WPS. Inaasinta ng China ang yamang dagat ng Pilipinas. Binubugaw ng mga armadong barko nila ang exploration vessels ng Pilipinas at mga nilisensiyahan ng Dept. of Energy. Binabaril at wino-water cannon ang mga mangingisdang Pilipino. Mahigit 1.2 bilyong kilo ng isda ang ninanakaw ng Chinese poachers sa Mischief at Subi Reef na inagaw din mula sa Pilipinas. Nu’ng Hunyo 2019 binangga ng lantsang bakal ng Chinese maritime militia ang naka-angklang kahoy na bangkang GemVer-1, at inabandona ang 22 Pilipinong tumilapon sa madilim, malamig, at malalim na tubig.
Mayo 2016 pa huling nambihag ang Pilipinas ng Chinese poachers.
- Latest