Salamat Globe!

Sugod karong adlawa, awhagon nako ang kapin sa 84 mil ka senior citizens dinhi sa Cebu City nga ayaw mo pagbiya sa inyong panimalay, ug huwata ninyo ang mga kawani sa City Hall nga mohatod sa inyong cash assistance.

Kon dili makaabot sa inyong balay karong adlawa ang mga disbursing officers sa City Treasurer’s Office, Department of Social Welfare and Services (DSWS), paghuwat lang gyud.

Anugon kaayo kon dili kamo makakobra sa inyong cash assistance nga P3,000 pananglit wala mo sa inyong balay. Unya, kadtong mga senior nga tua sa laing lugar, pauli mo.

Nasayod ko nga daghang senior citizens nga ang ngalan ra maoy rehistrado, apan botante hinoon sila dinhi sa siyudad, pero tua gyud sila nagpuyo sa laing mga dapit.

* * *

Akong pasalamatan si Sir Patrick Steven Gloria, director for external affairs sa Globe Telecom dinhi sa Cebu, kay nasulbad na gyud tawon ang kahinay sa akong internet, ilabi na panahon nga mag-live broadcast ko sa akong programa sa radio ug Facebook.

Pwerte na gyud nga tin-awa sa akong signal ug wa na magputol-putol ang signal. Ang akong broadcast station diha mahimutang sa bukid sa Dakbayan sa Sugbo, apan bisan pa niana, nangita gyud sila’g paagi.

Ang akong programa nga Birador mabati sa radyo DYLA, ug makita usab live sa Facebook alas 8:00 ngadto sa alas 9:00 sa gabii, ug ang Panid sa Kagabhion nga mobasa ko og sugilanon, alas 9:00 ngadto sa alas 9:30. Makita kini pinaagi sa Birador Page, ug sa akong account nga Rene Ugsimar Borromeo.

* * *

Karong buwana, daghan unta kaayo og kalihokan ang mga sakop sa media dinhi sa Cebu City. Ang Press Freedom Week himoon sa ikatulong semana ug ang tibook buwan, giisip nga Broadcaster’s Month.

Apan akong nasayran nga wa nay kasadya alang unta niining duha ka kalihokan tungod sa Corona Virus pandemic. Magmingaw ang mga sakop sa media kay ang Modified GCQ pabilin nga gipatuman ning buwana.

* * *

Angay’ng hashasan gyud pag-ayo sa LTO ug LTFRB ang mga PUJ nga tugotan nga makabalik pagbiyahe. Kadto ra gyud nga makapasar sa “road worthiness” check ang hatagan og pagtugot.

Kadtong mga sakyanan nga bisan pa og maayo og makina, apan ang mga pasahero mahasol pag-ayo sa ilang pagsakay, dili na maayong padaganon pagbalik.

Ang uban nga ang mga lingkoranan way mga back protector, head protector, unya ang mga pasahero mag-abot ang mga tuhod kay ang maong mga sakyanan dili man gyud unta haum nga himoong pasaheroan.