Gipalabi ang serbisyo kay sa kaugalingong panglawas

Sulod sa hataas nga panahon sa pagsugod sa COVID-19 pandemic hands on si Cebu City Mayor Edgardo Labella sa pag-atiman sa mga lakang sa pagpakigbatok sa virus dili lang sa COVID-19 kondili virus sa mga pagsaway gikan sa iyang mga kritiko. Kini ilabi na dihang miburot gyud ang mga kaso sa COVID-19 sa syudad nga nagtukmod sa presidente nga mipadala ni Secretary Roy Cimatu ang covid overseer sa dakbayan sa Sugbo.

Wala lang gihilam-os kon dili gikaligo na gyud ni Labella ang mga pagsaway sa mga wala makauyon sa iyang gipanghimo ilabi na kadtong mga tawo nga ang mga negative side ra ang makita.

Ang mga sakop sa media ilabi na kadtong padayon nga nag-field ang saksi sa gipanghimo sa mayor nga bisan gani luya na ang iyang lawas nga mabati usab sa iyang tingog apan padayon siyang nagpakalig-on aron maserbisyohan ang katawhan.

Hilabihan niya ka-busy nga usahay makalagot na kay dili mo-reply o motubag sa cellphone kon tawagan sa media. Admittedly, ako mismo usahay nadismaya kay morag dili man sayon abton ang mayor sa panahon nga kuhaan siya og mga inpormasyon. Sa susamang higayon inig masakpan na sa media, dili man siya mobalibad nga magpa-interview. Apan namatikdan nako nga murag lahi ra man ang panglawas niya nga lapoy ug luya pero naningkamot nga molig-on.

Ang akong cameraman nangutana kon duna bay sakit ang mayor tungod kay nakamatikod pud siya nga naay gipamati sa lawas kini.

Ug naa gyud diay siyay gihambin nga balatian diin ayha ra niya gihatagan og pagtagad kagahapong adlawa diin gipaubos siya og operasyon sa iyang gall bladder.

Sa wala pa kini mitambong pa siya sa mga kalihokan sama sa send-off ceremony sa kapolisan sa regions 6 and 8 kinsa iyang gipasalamatan ang mga police sa natampo batok sa virus.

Apan bug-at na diay to ang iyang gibati nga gikinahanglan na nga hatagan og pagtagad busa nagpa-opera na kini kay dili madala sa iyang lawas.

Dinhi nato makita ang dedikasyon sa mayor nga bisan og nag-ungaw sa peligro ang iyang kinabuhi apan giuna pa niya ang pag atiman sa suliran sa COVID-19 kay sa iyang kaugalingon. Ingon niini ang inamahan nga pagpangga niya sa mga Sugboanon.

Magpakaayo ka Mayor Edgar Labella.