Murag-GCQ mas makaayo

Sa kataposan nakakanaug na gyud ang dakbayan sa Sugbo sa modified general community quarantine o MGCQ nga maoy gihuwat sa mga tawo tungod hasol kuno ang gipatuman nga mga restriction.

Apan daghan ang nadismaya kay mao ra man diay gihapon ang resulta sanglit magpabilin pa man ang mga restrictions.

Mao ni ang gitawag sa uban nga ang meaning kuno sa MGCQ sa dakbayan sa Sugbo kay Murag General Community Quarantine inay modified general community quarantine diin giangalan sa uban ang padayon nga pag gamit sa quarantine pass.

Lisod gyud kuno kaayo ang kinabuhi sa mga tawo nga limitado ang kalihokan kay dili man gyud makapataka og gawas kon walay quarantine pass, nahulog kuno nga wala gihapoy kapuslanan ang pag ubos sa quarantine status.

Alang nako mas maayo nga ingon niiini gihapon ang gipatuman sa kagamhanans sa syudad kay mabutang lang sa wala ang paningkamot nato nga ma-flattened ang curve sa COVOD-19 kon paundayonan nato ang gusto sa uban nga mamahimong gawasnon na manglihok lihok.

Angayan natong hinumduman nga naa pa gihapon kita sa quarantine status bisan og modified na diin nagpasabot lang nga duna gihapoy protocol nga sundon.

Basin nalimtan sa uban nga usa ka higayon ang Cebu City nabantog tungod sa ka gahi sa ulo sa mga tawo nga misangpot sa pagburot sa kaso sa coronavirus nga nahimo ganing epicenter sa kagaw.

Apan tungod sa paningkamot sa kagamhanan ug sa katawhan nagmalamposon kita nga makahaw-as sa taga liog nga kagaw kay kon gipaundayonan pa nato ang kinaiya sa mga tawo basin nalumos na ta sa COVID simbako lang.

Samtang wala pay tambal o panguntra sa virus gikinahanglan gyud nga magpaka tig-a sa balatian ang amahan sa dakbayan kay kon magpadala sa kaluoy mahulog nga kitang tanan makaluluoy.

Magsinabtanay ug magtinabangay kita aron padayon nga mosutoy ngadto sa pagkalingkawas sa hingpit sa kalisdanan nga mugna sa virus.