MGCQ na kaha ang dakbayan sa Sugbo
Puwede na nga mapaubos sa modified general community quarantine ang dakbayan sa Sugbo. Kini tungod sa padayon nga pag-ubos sa gidaghanon sa mga natakboyan sa mananakod nga COVID-19. Mao na ni karon ang gusto ni Mayor Edgardo Labella. Ang problema, supak niini ang liderato sa kapolisan dinhi sa rehiyon 7.
Si Heneral Albert Ignatius Ferro mirekomendar nga ipabilin lamang una sa general community quarantine ang dakbayan sa Sugbo agi og pagpaniguro.
Ang heneral nangayo og pito ka adlaw o usa ka semana o igong panahon nga mahulipan ang mga sakop sa Special Action Force (SAF) og laing puwersa sa dili pa luagan ang estado sa kuwarantinas sa dakbayan sa Sugbo.
Dili diay puwede heneral nga pulihan dayon ang mamauling SAF? Paaboton pa gyod diay ang usa ka semana?
* * *
Nagsugod na sa ilang imbestigasyon ang National Bureau of Investigation (NBI) dinhi sa Central Visayas sa pasangil nga kahiwian ug korapsyon sa Philippine Health Insurance Corporation (PhilHealth).
Duha ka klase ang korapsyon: pity o ginagmay ug institutionalized o dagkong korapsyon. Ang pity nga korapsyon mao ang kasagaran nga makit-an sa kadalanan nga gihimo sa mga traffic enforcers ug polis. Samtang ang institutionalized nga korapsyon mao ang anaa sa mga dagkong opisina sama niining korapsyon sa PhilHealth.
Talagsaon ang pamaagi nga gigamit sa mga opisyal sa PhilHealth sa ilang pagsuyop sa salapi nga gipanag-iya sa mga sakop niini. Pinaagi sa pagpakigkonsabo sa mga doktor ug tambalanan hapit nila matilok ang kuwarta sa PhilHealth. Maong angayan silang bitayon patuwad. Ang mga buaya sa modernong panahon wala na magpuyo sa mga sapa ug suba. Anaa na kini sila magpuyo sa mga opisina nagpabugnaw.
- Latest