All-out war batok mga terorista

Gitay-og na usab ang nasud og hilabihan ka dugoon nga pagpangatake sa mga separatesta’ng terorista kinsa migamit og mga suicide bomber alang sa ilang padayong kawsa sa pagpanghasi sa katawhan didto sa Mindanao.

Duha ka bomba ang gipabuto sa giingong mga teroristang Abu Sayyaf didto sa commercial district sa Jolo sa probinsiya sa Sulu nga mipatay og 15 ka tawo, lakip na ang pipila ka sundalo, ug mi-injured usab og daghan sa niaging semana.

Matud pa sa taho sa hepe sa Armed Forces of the Philippines, duha ka babaye ang maong mga suicide bomber. Ang usa niini giingong usa ka Indonesian nga asawa sa usa ka Pilipino kinsa usa usab ka suicide bomber kaniadto.

Sa nanglabay nga katuigan, ordinaryo na ang mga suicide bombing didto sa Mindanao. Daghan na hinuon ang nakamatikod nga morag nakakuha og ideya kining mga bandido sa nasud sa mga panghitabo didto sa Middle East diin uso ang mga suicide bombing.

Sa akong tan-aw, isip natawo ug nagdako didto sa Mindanao, morag nagkagrabe na man hinuon ang sitwasyon didto sa maong rehiyon bisan pa sa kampanya sa kagamhanan batok sa mga grupong bandido.

Bisan pa sa gihingusgan nga krusada sa gobiyerno sukad pa sa nanglabay nga mga administrasyon, padayon kining mga terrorist activities sa nasud. Gani morag nagka-high tech na usab kining mga bandido didto sa Mindanao.

Siguro panahon na nga gamiton sa kagamhanan ang tanang resources ug kapabilidad niini sa krusada pagpuo niining Abu Sayyaf ug ubang teroristang grupo sa nasud. Angay lamang nga ipakita sa atong Armadong Kusog nga aduna kini kapasidad pagkontrolar niining mga bandido.

Dili gayud makabaton ug tumang kalinaw ang Mindanao kun padayon nga maghasi ang mga terorista didto. Alang sa tinuoray nga kalamboan sa Mindanao ug tibuok nasud, panahon na nga ipatuman sa kagamhanan ang all-out war batok niining mga bandido.