Loyal Banat fans

Ang kadali ra gayod sa dagan sa panahon. Kon akong lingiog balik kadtong adlaw, Agosto 23, 1994 nga gikahibalag ko sa aseras sa dalan Colon ang pagkahimugso sa The Freeman Banat News, daw kagahapon ra gyod ang kilab sa daghang katuigang milabay, diin sa akong pagmata, Agosto 23, 2020, nasuta kong mo-26 anyos na man diay ang edad ning Binisayang mantalaan nga nahimo nang kabahin sa akong kinabuhi.

Ning maong gidugayon sa paglawig sa TF Banat News, diin ikatandi na siya sa dakong punoan sa manggang namungingi sa mga tam-is-laming bunga, may pipila na ka dahon nga nahatipik sa iyang sanga ang nangalarag, nangapulak ug atua, mipanaw na.

Apan sa ilang pagkapulak, may misubol usab nga mga bag-ong udlot, kinsa mihulip sa mga nangalarag aron ipadayon ang kalab-as sa mga salingsing nga yunyonan sa mas daghan pang makaiibog nga bunga.

Ug mao kini hinungdan, nganong bisan pa sa gumonhap nga mihasmag sa tibuok kalibotan karon, diin puwerte nang gubaa sa ekonomiya dungan sa pagkalunod sa daghang patigayon, pabiling milutaw ang TF Banat News sa iyang paglawig nga padayong midalit sa katawhan og mga lab-as Balita, Hugyaw, Opinyon ug ubang potahe.

Ang mga nobelang puno sa kainit sa gugma’g romansa, morag tam-is lansones, kanunayng gikuninitan sa mga sulom, kinsa gusto pong modimdim sa nag-agos nga Dugos ni Eba.

Ang sports column nga dili gyod mosipyat pagsibya inig ka sulod sa bola sa NBA ring nga gihansak sa mga star players ug inig tugpa sa kusog kinumo ni Manny Pacquiao ngadto sa hambogerong kontra, gidugokan sab sa mga suking magbabasa nga daw magpangita na niini.

Ug niining bag-o, among silingan kang kansang bana nagtrabaho sa Seven Eleven Convenient Store, mitug-an, nga kada Lunes ug Biyernes mopalit gyod kuno iyang mister og TF Banat News kay naa koy kolum sa Opinyon nga pirme niining basahon. Mora ko’g nalanay. Wala kaha ko atika?

Hinuon, tanang kolumnista sa Opinyon may iya-iyang suking readers, followers and fans. Adunay moduol, moistorya sa kaugalingong kasinatian nga ipa—Banat.

Mga intellectual ang magbasahan niining koluma. Ug gikalipay ko, nga among silingan usa kanila.

Mga loyal TF BN fans, kaninyong tanan, daghang salamat!