Di maayo ang 'bringing up'

Miluwat si Japan Prime Minister Shinzo Abe sa iyang katungdanan tungod sa gihambin niini nga balatian nga sa iyang pagtuo makabalda kaniya sa pagpadayon pag-alagad. Adunay susama’ng kahimtang si Presidente Duterte kay aduna usab siya’y gihambin nga balatian.  Sa Japan, nakugang ug nahingawa sa iyang pagluwat ang mga gitumbok nga mopuli sa prime minister; samtang sa Pilipinas, naghigwaos ug nagpunay ug sulsol ug panaway ang buot mopuli sa Presidente.  Matud pa sa akong hamtong nga silingan, “Way batasan ang politiko’ng Pilipino.  Dili maayo ang ‘bringing-up’ (up-bringing)”.  Baya no!

Nagduwa-duwa sa kawsa

Human gisalindot sa Presidente ang ilang kawsa, ang pundok nga buot motukod og usa ka rebolusyonaryo nga kagamhanan (RevGov) mipunting na karon sa ilang panan-aw ngadto kang Bise Presidente Leni Robredo isip maoy alternatibo nga mangulo sa ilang kawsa.  Apan bisan niining maong lakang, buot gihapon sa pundok nga mausab ang hunahuna sa Presidente kay alang kanila, kulang sa kapabilidad ang bise presidente. Gawas nga daw nagbugal-bugal kining nagpasiugda sa RevGov sa bise presidente, mipakita usab sila sa ilang duha ka dagway.  Nahisama sila sa mga nagduwa nga mga bata nga nagpili kinsay ikauban sa grupo. Pag-chure mo uy!

Langit ra’y nasayod

Matud pa ni Health Undersecretary Maria Rosario Vegeire, diyotay na lang ang COVID-19 nga pasyente nga na-admit sa mga tambalanan human gipatuman ang MECQ sa Metro Manila ug sa mga kanait nga probinsya.  Apan gitataw sa USec nga ang pagpahamtang sa MECQ wa gitumong sa pagpamenos sa gidaghanon sa kaso sa COVID-19.  Makalibog ang maong pamahayag sa USec.  Mas may gibug-aton ang obserbasyon sa akong higala: “sa dihang gisugdan na pag-imbestigar ang anomaliya sa PhilHealth, mikunhod gilayon ang kaso sa COVID-19”. Kon may koneksyon man ang anomaliya sa PhilHealth ug sa gidaghanon sa kaso sa COVID-19, ‘Langit Ra’y Nasayod’. Fezteleern!

Amendahon ang balaod

Misuporta ang mga magbabalaod sa panawagan sa business sector nga hunongon una ang pagpanday ug mga balaodnon nga naghatag dugang diskwento labi na niining panahon sa pandemic.  Daw salikwaot ang maong mga pahayag.  Sa natad sa patigayon, labing mopatigbabaw ang balaod sa “supply and demand”.  Ang paghatag diskwento tipik lamang sa mga promotional gimmick nga sagad buhaton sa negosyante kon naghinobra ang supply apan walay panginahanglan.  Sugyot sa mga gwatsinanggo, mas maayo pa nga ilang amendahon ang “Balaod sa Supply and Demand”.  Pagkatoytoy!

Usapa na ninyo

Sumala sa usa ka survey nga gipahigayon sa PUBLiCUS Asia Inc., mitala si Senador Manny Pacquiao sa labing taas nga approval trust ratings itandi sa tanang mga naglingkod nga senador karon.  Ang maong kalamboan naghimo kang Senador Pacquiao nga labing unang senador nga nakadawat og mayoriya nga pag-uyon ug pagsalig sa tibuok nasud.  Sa mga kritiko sa senador, daw tampaling sa nawong kining maong balita.  Daw mabasa nato sa pahiyom ni Senador Pacquiao ang mga pulong nga, “Usapa na ninyo”.  Saoonz!