Fixer sa LTO-Mandaue

Akong saludohan ang hepe sa LTO Registration Branch sa Mandaue City District Office kay bisan og siya usa ka babaye, apan may kaisog siya pagkoreher sa mga sayop nga gipasagdan ra sa nangaging mga hepe sa LTO diha.

Nasayod ko nga daghan ang mangasuko sa gihimo ni Ma’am Melva Rodriguez Vasquez, tungod kay dunay nga “fixer” nga anaa manginabuhi sa LTO sulod sa dugay na nga katuigan ug gipasagdan ra sa mga nangagi nga hepe.

Gisuginlan ko ni Ma’am Melva nga grabe kaayo ang gihimo sa ubang fixer nga manguwarta, pinaagi sa pagpangayo’g bayad gikan sa mga mokuha og rehistro nga gustong madali pag-approve ang ilang transaksyon.

Unya, dunay “fixer” nga usahay magpurol-purol ra gani, mosulod sa opisina ug moduol sa mga LTO employees aron nga ipauna pag-asikaso ang mga dukomento nga iyang gidala. Uy, kadakong pamentaha.

Mao nga kay nakabantay man si Ma’am Melva niini, iyang gitawag ang “fixer” ug giingnan nga dili mosulod-sulod sa opisina, ilabi na nga wa na niya itugot nga dunay mag-fixer sa opisina sa LTO nga iyang gidumala. Giingnan si Ma’am Melva sa “fixer” nga sa tanang nangagi nga LTO sa Mandaue, ang uban gani mga lalaki pa, si Ma’am Melva ra ang nakahimo pagbadlong niya.

Angay gyud kini nga hunongon. Sayod ko nga manginabuhi ni sa mga “fixer” apan sa mga opisina sa gobiyerno, dili maayo nga paundayonan kining mga tawhana kay pamentaha ning ila.

Sayonan ka nga mosulod pa sa opisina ug ingnon ang mga LTO employees nga ipauna pagtagad ang ilang mga transaksyon kay nagpaabot ang mga mibayad kanila?

Nalipay ko nga si LTO-7 Regional Director Vic Caindec misuporta gyud kang ma’am Melva kay utro pa man nga supak gyud si sir Caindec og mga binuang. Wa gyud ka masayop sir Vic sa pagtudlo ni ma’am Melva sa posisyon pagka hepe sa LTO Registration Branch diha sa Mandaue.

Nakasabot ko nga dunay ubang mga nagdumala sa mga LTO nga mi-tolerate ra niining maong binuhatan, ilabi na kon sila makakwarta sab kay hatagan og bahin gikan sa mga “fixers” nga ilang gitugotan nga maka-operate diha sa ilang opisina.

Mao man bitaw nga modayeg gyud ko sa mga kaila nako nga mga hepe sa LTO registration branch nga sila si Ma’am Melva, ug si sir “Tata” Maloloy-on sa LTO Cebu City District-1 Branch, kay trabaho ra gyud ang ila.

Nagpaniid ko sa mga kalihokan ni Sir Vic Caindec kon dili ba siya sama og batasan sa usa ka kanhi LTO director nga nagpabilib, apan gisilotan gani tungod sa binuang. Akong nasuta nga lahi si sir Vic kanila.