Saludo gyud ko

Kinasingkasing ko nga moyukbo ug magpasalamat ni Lapu-Lapu City Mayor Junard “Ahong” Chan, ug sa iyang department head nga gipadumala sa City Social Welfare and Development Office nga si Ma’am Anabeth Cuizon.

Ingon niini ang nahitabo. Kaniadtong Sabado sa buntag, dunay mi-text nako og nangayo’g tabang kay nasunog ang ilang balay ug nakaangkon sila og mga paso sa kalawasan.

Wa gyud sila’y ikapalit og tambal sa mga paso. Nakahunahuna ko nga Sabado ra ba, way opisina ang mga kawani sa gobiyerno. Ang text message nga nadawat nako gikan sa usa ka “Taneo” akong gi-forward ni Ma’am Abeth.

Abtik kaayong nakatubag si Ma’am Abeth nga tagdon nila dayon ang akong giduso kaniya nga nangayo’g tabang. Paglabay sa mga usa ka oras, giteksan na ko ni Ma’am Abeth og hulagway nga didto na sila sa ospital sa Olango ug giadto na nila ang nangayo’g tabang.

Ambot, dili tingali mo motuo nga nanglugmay ang akong mga luha sa kalipay sa gipakitang pagtabang ni ma’am Abeth sa maong biktima sa sunog nga lumolupyo sa ilang siyudad.

Nakaingon ko nga wa gyud masayop si Mayor Ahong Chan pagtudlo ni Ma’am Abeth nga maoy social worker chief sa Lapu-Lapu.

Nakahinumdom ko nga si Ma’am Abeth natakdan sab ni siya og coronavirus kay bisan og risgo na kaayo, apan padayon siya nga nanuroy sa kabarangayan aron sa pagpanghatag og mga tabang sa mga lumolupyo.

Usbon nako, ingon niini ang angay’ng sundon sa ubang mga kawani sa kagamhanan. Dili pagpanghambog, kon ako’y opisyal sa gobiyerno nga nagdawat og sweldo gikan sa buhis sa katawhan, ingon usab niini ang akong himoon. Usbon nako, saludo ko ninyo ma’am Abeth ug Mayor Chan!

* * *

Nahuman na ang pagpanghatag sa natanggong nga cash assistance alang sa mga PWD dinhi sa siyudad sa Sugbo. Karon, angay na usab nga ang mga kawani sa OSCA, ug DSWS, magtinabangay aron mahatag na usab sa mga senior citizens ang ilang cash assistance para sa buwan sa Hunyo, Hulyo ug Agosto.

Ang akong programa sa radyo ug Facebook kanunay’ng makadawat og yangungo gikan sa mga senior citizens nga nagpangutana kon kanus-a sila makadawat sa tulo nila ka buwan nga cash assistance.

Akong hangyoon si Mayor Edgar Labella nga ipalihok na usab sa imong mga sakop mayor kay luoy man gud ang mga seniors nga wa pa sila makagawas-gawas tungod sa pagdili kanila, unya wa pa gyuy cash assistance. Kamong mga seniors huwat-huwat ra kay si Mayor Labella buotan na ug makasabot sa inyong mga sentimento.