Kaya ba nating panindigan ito?
Sa malapit na hinaharap, posibleng magkakaroon ng radikal na pagbabago sa ating pasaporte. Ililimbag dito ang mapa ng Pilipinas na kasama ang West Philippine Sea at ang Sabah na bagama’t parte ng Pilipinas nung unang panahon ay bahagi na ngayon ng Malaysia dahil sa teknikalidad.
Inaprobahan na ng House panel ng Kamara de Representante ang paglilimbag sa pinalawak na mapa ng Pilipinas sa ating pasaporte. Ano kaya ang magiging reaksyon ng mga bansang may paghahabol sa pinagtatalunan pang WPS partikular na ang China, at ang Malaysia?
Ayon kay Cagayan de Oro Rep. Rufus Rodriguez, nilalayon ng House Bill 6399 na bigyang diin ang tagumpay ng Pilipinas laban sa WPS na pinagtibay ng International Arbitral Tribunal noong panahon ni Presidente Noynoy Aquino sa The Hague Netherlands, gayundin ang ating historical rights sa Sabah.
Alam na ng lahat na ang Sabah ay inarkila ng Britanya nang sakupin nito ang Malaysia, kaya nang bigyan ng kalayaan ang Malaysia, ang Sabah ay naging parte ng ng naturang bansa sa kabila ng patuloy na pag-aangkin ng Pilipinas dito.
Tiyak na may diplomatic impact nito. Malamang maghahain ng protesta ang mga kinauukulang bansa lalo na ang China at Malaysia kapag ang bagong batas sa pasaporte ay naipatupad. Pero para sa akin ay tama lang ito dahil matagal na tayong susukutsukot sa pambu-bully ng China pero tila amen lang ng amen ang administrasyon.
Maliit nga tayong bansa pero hindi nangangahulugan at hindi na natin ipaglalaban ang ating karapatan. Sayang naman ang dugong ibinuwis ng ating mga bayaning naghandog ng buhay para sa ating kalayaan at soberenya.
- Latest
