Abusado ra gyud kayo

Ang Dios maluloy-on kaayo. Gani sa iyang pagkamaluloy-on iyang gihatagan ang matag usa kanato og kahigayonan nga magbag-o.

Ingon ana kaseryoso si Lord alang kanato apan ang pangutana mao kun ingon ana ba kaha kita ka seryoso sa atong paghatag og bili sa iyang pagsakripisyo.

Ambot lang pud kaha. Kitang tanan ang mahimong nibalewala ra pud sa iyang kaayo kay mas gipalabi nato ang atong kinaugalingong tuyo ug pangandoy nga hawa sa maong kabubut-ong Diosnon.

Sa akong paglakawlakaw nakita ko ang daghang mga tawo nga naglinya intawon ug nagpunsisok kay lagi hinatagay naman pud diay sa ayuda.

Social distancing man o wala mahinungdanon kaayo alang kanila kining maong kahigayonan nga matabangan sila bisan na lang og ginagmay.

Ang pagdawat og hinabang bisan kun ginagmay dako naman kaayo og kahimoan aron sa ingon mamahimong maka-feel ang hingtungdan nga sila apil sa mga tawo nga giisip nga bililhon sa atong pamunoan. Apan kadtong uban nga wala gyud maapil ambot kun unsa pud kaha ang ilang gihambing pagbati.

Daghan nato ang nagpunay lang og angal gumikan sa kalisod nga nasinati nato karon. Daghan nato ang wala gyud tawon makontento.

Daghan nato ang wala gyud malipay. Apan ambot lang kaha kun atong nakita nga bisan pa man sa kalisdanan angayan gihapon kitang magpasalamat  tungod kay kita buhi pa man sa gihapon karong mga panahona.

Apan dunay mga tawo nga abusado usab. Nakadawat sa grasya apan nag-usik niini. Gikan nakadawat og ayuda tua naman nuon sa roydahan!

Tua sa sugalan, inuman! Ang uban pa gyud nigamit sa nadawat sa pagpalit sa ginadiling drugas.

Ang uban gani diha bisan kun igo lang sila sa pagdawat og limpiyo kawaton pa gyud ang dili alang nila? Asa man ang kaangayan ning kalakiha?

Daghan kaayo ang mga abusado karon higala ug gani diha sa ilang paghatag og mga komentaryo padayon nilang giyubit ang kakabus ug kawalay alamag sa kadaghanan.

Kining mga tawhana daw mga anghel apan pag-umangkon diay ni Satanas! Ning panahon karon timan-i: “Do not trust everything because even salt will look like sugar!”