EDITORYAL - Motorcycle barriers

Nakasabot ra gyud sa kataposan ang mga kadagkoan sa National Task Force Against Covid-19 bahin sa reklamo ug pagsaway kanila sa publiko bahin sa una nilang giinsister nga motorcycle barriers alang sa mga magmotor nga mag-angkas.

Ang tumong sa barriers mao ang proteksyon sa mga nagsakay sa motorsiklo, drayber ug ang ilang angkas. Wala kini kwestyon kun ang motor gihimo pasaheroan diin dili managkaila ang drayber ug pasahero, o ba kaha wala magpuyo sa usa lang ka panimalay ang duha.

Nahimo kataw-anan ug dili na praktikal maong giulan og mga bugalbugal diha sa social media ang mga opisyales sa IATF, usa niini si DILG Sec. Eduardo Año tungod sa pag-insister niini sa barriers bisan sa mga magtiayon.

Mitumaw sab ang pangutana sa kaluwasan sa mga nagsakay tungod kay ang desinyo ug materyales nga gigamit sa barriers mosawo ug mobanda ang hangin nga matud pa sa mga eksperto sa mga motorsiklo, peligro kaayo sa disgrasya.

Nabalaka sila nga mas mapadali sila og kamatay sa aksidente ug dili sa COVID-19 kun ipamugos ang barriers sa mga magtiayon nga magdulog pa gani og pangatulog o managkabanay nga parehas ra og balay nga gipuy-an.

Sa mga dili pareho og balay nga gipuy-an, tingali kinahanglan gyud gihapon ang barriers. Apan isip responsableng tawo, karong panahon sa pandemiya dili gyud ka magpasakay kun dili nimo ig-unsa ug labaw na kun nasayod ka sa pagkatawo sa gustong moangkas.

Apan aron wa nay lalis, mas maayong i-require nalang gyud ang drayber ug ang angkas nga magsuot pareho og full-faced helmet ug facemask.

Sama sa pagsuot sa mga facemask, face shields ug social distancing, ang dugang proteksyon ug makapataas ang tsansang di daling matakdan ang tawo, apan kinahanglang praktikal ug katuohan aron seryusohon pagsunod sa mga tawo.

Kay ang labing siguro, wala pa gyud mawagtang ang hulga sa virus.