Kompromiso

Nakapuntos og dako ang Sugbo sa kampanya sa pagpaubos sa kaso niini sa Covid-19. Kini human nga gihimong ehemplo sa mga hanas sa University of the Philippines (UP) ang Sugbo tungod sa kalampusan niini pagpislat sa kaso sa COVID-19 human gipatuman ang mas istriktong istado sa kuwarantinas.

Ang pagbalik sa estado sa kuwarantinas gikan sa general community quarantine ngadto sa enhanced community quarantine nga maoy nakapislat sa miburot nga kaso sa COVID-19 mao ang gihimong basihanan sa mga hanas sa UP sa pagrekomendar ngadto sa mga sakop sa Inter-Agency Task Force ug kang Presidente Rodrigo Duterte nga ipabilin sa Modified ECQ ang Metro Manila ug mga silingan nga lalawigan nga nagpadayon sa pagtaas ang mga kaso sa COVID-19.

Hinuon wala paminawa sa task force ug sa Presidente ang rekomendasyon ug gipaubos sa GCQ ang Metro Manila ug mga silingan nga lalawigan tungod sa rason nga ekonomiya.

Sa miaging Lunes, pito lamang ang bag-ong kaso sa COVID-19 ang natala sa dakbayan sa Sugbo samtang duha na ka adlaw nga nagsunod nga wala gayoy kaso nga natala sa dakbayan sa Talisay.

Nagkaubos usab ang mga kaso sa dakbayan sa Mandaue ug Lapu-Lapu.

Ang mga anaa sa profession sa medisina wala makauyon sa hukom sa IATF ug ni Presidente Rodrigo Duterte nga mipaubos sa istado sa kuwarantinas sa Metro Manila ug mga silingang lalawigan tungod sa pagpabor sa ekonomiya kay sa panglawas sa katawhan.

Apan kun ikaw ang anaa sa poder sa IATF ug ni Presidente Duterte unsa man pod kaha ang imong buhaton?

Ang gobyerno kinahanglan nga mobalansi sa iyang hukom aron dili mosamot ang pagkakompromiso sa ekonomiya tungod sa paghatag og pabor sa panglawas.

Tungod kay gihatagan og pabor sa gobiyerno ang panglawas, daghan ang nawagtangan og trabaho ug daghang trabahoan ang nanirado nga miresulta sa pagkahagba sa ekonomiya.

Kun padayonon kini sa gobiyerno asa pa man unya siya og ihatag nga ayuda ngadto sa katawhan nga nanginahanglan og tabang tungod sa pandimiya?